01 августа 2017 г.
Ял тăрăхĕсенче тирпей-илемпе, пушар хăрушсăрлăхĕпе, обществăлла йĕркелĕхе пăхăнассипе çыхăннă татса памалли ыйту сахал мар. Ун пек чухне поселени пуçлăхĕ пĕччен нимĕн те тăваймĕ. Халăх суйланă депутатсемпе ял старостисем _ унăн пĕрремĕш пулăшаканĕсем. Нăрваш Шăхаль ял тăрăх пуçлăхĕ Н. Раськин çакна тăтăшах тĕпе хурса ĕçлеме тăрăшать. Çак кунсенче ял тăрăх администрацийĕн черетлĕ ларăвне ытти яваплă çынсемпе пĕрлех Нăрваш Шăхаль тата Вăрманхĕрри Шăхаль ялĕсен старостисем Николай Узалуковпа Василий Николаев, Анатолий Матвеев та хутшăннă. Çакă сăлтавсăрах та мар. Инициативлă бюджет аукционĕпе масарсене тирпей-илем кĕртес тĕлĕшпе "Стройкомфорт" общество яваплăха выляса илнĕ. Ку чухне кирек мĕнле подряд организацийĕн строительство ĕçне те влаçрисем çеç мар, общественноç та тĕрĕслесе тăрасси çирĕп. Апла пулсан ял кăлави те "халăх тарçисене" çак ĕçе ахаль çеç шанман.
Источник: "Авангард" (газета Батыревского района)