18 августа 2017 г.
"Авангард" хаçатăн иртнĕ номерĕнче йывăр шăпаллă, нумай ачаллă çемьесенчи шкул ачисене, реабилитаци центрĕнче хỹтлĕх тупнисене шкула каймалли хатĕрсем илме пулăшма акци пуçланни пирки пĕлтернĕччĕ. Сăваплă ĕçшĕн кар тăракансем çийĕнчех тупăнчĕç. Акă, Шăнкăртамри Тĕп собор мечечĕ çак ялти пĕрремĕш вăтам шкулти тулли мар çемьеллĕ, сахал тупăшлă 15 ачана икшер пин тенкĕ уйăрма йышăннă. Аксакалсен канашĕн председателĕ Р. Хафизов редакцие пĕлтернĕ тăрăх, иртнĕ çул та вĕсем çакнашкал акцие хастар хутшăннă, кашни ачана шкула хатĕрленмелли япаласем туянма 4-шар пин тенкĕ панă. Çынна ырă туни ырăпах таврăнать. Çавăнпа та Шăнкăртамсен пархатарлă тĕслĕхне ыттисем те усă курасса шанас килет.
Источник: "Авангард" (газета Батыревского района)