29 августа 2017 г.
Иртнĕ эрнере çурçĕр иртсе икĕ сехетре Вăрманхĕрри Шăхалĕнчи Едифановсен хуçалăхĕнче сасартăк пушар алхасма тытăннă. Пысăк инкекре çурт-йĕр те, хуралтисем те юрăхсăра тухнă. Вăл çеç те мар. Вăрăм алăллă вут кỹршисене те ярса илнĕ. Пушарта вĕсен сарайĕсем те сиенленнĕ. Районти пушар надзорĕнчен пĕлтернĕ тăрăх, инкек чылай чухнехи пекех электричествăпа çыхăннă.
Паянхи кун тĕлне районĕпе 27 пушара шута илнĕ. Иртнĕ çулхи çак вăхăтрипе танлаштарсан виçĕ тĕслĕх ытларах. Вăл шутра Нăрваш Шăхаль ял тăрăхĕнче çеç пушарниксен икĕ хутчен вутпа куçа-куçăн кĕрешме тивнĕ.
Источник: "Авангард" (газета Батыревского района)