08 сентября 2017 г.
Чăваш Ен Пуçлăхĕ Михаил Игнатьев ĕç тăвакан влаç органĕсен тата Муниципалитетсен ертỹçисемпе ирттернĕ канашлура Çĕнĕ Шупашкарти ЖКХри МУПпа çыхăннă ĕç-пуçпа кăсăкланнă. Ăшă энергийĕпе тивĕçтерекен организаци 80 миллион тенкĕлĕх парăма пула суда тавăçпа тухнă май çак управляющи организаци çỹп-çапа илсе тухайман иккен. Шупашкарти "Коммуналлă технологисем" ООО тĕлĕшпе те ỹпкев пулнă _ газшăн çак компани 1 миллиард тенкĕ ытла тỹлемен.
Муркаш районĕнче вара "Партнер-холдинг" компани çул тăвассипе çыхăннă ĕçсене тăсса янă. Унта палăртнă ĕçсен 12 процентне çеç пурнăçланă. Халь пĕртен пĕр шанчăк _ субподрядчиксенче.
Тепĕр компание çулшăн кăна мар, урăххишĕн те сăмах тивнĕ. Вăл та, "Энергосервис", Тăвай райĕнĕнче пĕлтĕрех хута ямалла пулнă çула туман _ "çынсем виççĕмĕш çул çулсăр пурăнаççĕ!" Çийĕнчен çак компани Комсомольски районĕнчи электричество подстанцийĕсене _ социаллă пĕлтерĕшлĕ объектсене _ "хăй айне" тунă-мĕн. Çакăнпа çырлахман _ халь Канаш районĕнче те çак мелпех ĕçлет.
Михаил Игнатьев шанчăксăр компанисемпе çыхланма юраманни пирки тепĕр хут çирĕп асăрхаттарнă.
Источник: "Авангард" (газета Батыревского района)