Новости » Республика кунне хаклаççĕ

-Республикăра пурăнакан нумай нациллĕ халăхăмăрăн тĕп уявне эпир те районти сцена ăстисен коллективĕсемпе пĕрле «Евгения» ташă ушкăнĕпе хутшăнтăмăр. Сăмах май каласан, район чыс-сумне хỹтĕлес тĕлĕшпе эпир Республика кунĕн тĕп сцени çинче пĕрремĕш хут мар. Кашнинчех пысăк хавхаланупа, мăнаçланса таврăнатпăр. Кỹршĕ республика, ытти аякран килнĕ хăнасен пултарулăхне курни те питĕ савăнтарать, малалла тата та тăрăшарах ĕçлеме вăй парать.

Хальхинче эпир сцена çинче пиллĕкмĕш класран вĕренсе тухнă ачасемпе «Савăнса» («Радуясь») чăваш халăх ташшипе куракансене уяв ячĕпе саламларăмăр. Проект ăнăçлă пулса тухрĕ темелле. Çакă куракансем пире тăвăллăн алă çутса хакланинчен те сисĕнчĕ.

Патăрьел районĕ яланах çакнашкал мероприятисене хастар хутшăнать. Пирĕн коллективсăр пуçне кăçалхи уявра Сăкăтри вăтам шкулти «Нотки» (ертỹçи Т. Толстова) ташă ушкăнĕ те сцена илемĕ пулчĕ. Аякран та çывăхран килнĕ хăнасем кăмăллă савăнни уяв программи пуян та анлă содержаниллĕ пулнине тепĕр хут çирĕплетрĕ.