08:34 20 июля 2017 г.
Республика Пуçлăхĕ çумĕнче ăрусен çыхăнулăхне çирĕплетес, экономика, общество тата культура пурнăçĕнче ĕç ветеранĕсен пĕлтерĕшне ỹстерес тĕллевпе республика умĕнче пысăк чыс-хисеп çĕнсе илнĕ çынсенчен старейшинăсен Канашне туса хуни икĕ çула яхăн. Авторитетлă ушкăн йышĕпе те пысăк мар. Çапах та старейшинăсен Канашĕнчи 18 çынран виççĕшĕ _ Лев Кураков, Федор Карягин, Валентина Теллина _ пирĕн районтан тухнă хисеплĕ çынсем пулни питех те кăмăллă. Аслă та ăслă çынсен ертỹçи те Юхмапа Пăла тăрăхĕнченех. Виçĕмкун, районăн хисеплĕ гражданинĕ, старейшинсен Канашĕн председателĕ Лев Пантелеймонович ертсе пынипе çак ушкăн пирĕн районта пулчĕ.
Патăрьелсем хăнасене яланах тарават. Ыхра Çырми ял тăрăх территорийĕнче вĕсене район администарци пуçлăхĕн çумĕ _ экономика, ял хуçалăх тата çĕр хутшăнăвĕсен пай пуçлăхĕ Л. Кузнецов, ял тăрăх пуçлăхĕ Ф. Алиуллов хапăл туса кĕтсе илчĕç. Ĕçлĕ çулçỹревĕн малтанхи маршручĕ Ыхра Çырминчи Р. Сазяпов фермер хуçалăхĕн аш-какай тирпейлекен цехĕнчен пуçланчĕ. Производство хăвачĕ пĕчĕк мар. Хальхи вăхăтра та кунта талăкне пĕр тонна ытла (хăвачĕ виçĕ тонна таранах) продукци туса кăлараççĕ. Ассортимечĕ те пуян: тĕрлĕ кăлпассинчен, тултармăшран пуçласа пельмень, манты таранах хатĕрлеççĕ ăстасем. Марина Евграфова инженер-технолог калашле, таварсем хуçисене кĕтсе выртмаççĕ. Вĕсем кăларакан хăшпĕр çимĕçсене ас тивнĕ хыççăн, çакна старейшина Канашĕн членĕсем те çирĕплетме пултарчĕç. Ашран хатĕрленĕ çимĕçсем экологи тĕлĕшĕнчен таса, сĕтеклĕ, тутлă. Цехпа паллашнă вăхăтра Леонид Валерьевич пирĕн тăрăхра пĕчĕк тата вăтам бизнеса аталанма кирлĕ условисем туса панине, кăçал çеç 15 инвестици проектне пурнăçа кĕртсе тепĕр 60 ытла çĕнĕ ĕç вырăнĕсем уçма пултарнине пĕлтерчĕ, малашлăх плансемпе те паллаштарчĕ.
Сăмах май каласан, пирĕн районтах выльăх-чĕрлĕхе пусса тирпейлес, унăн какайне производствăна кĕртес тĕлĕшпе тепĕр цех та ăнăçлă ĕçлет. Шăнкăртамри "Али" СПСК та сменăра пĕр тоннăран кая мар хатĕр продукци кăларать.
Малалла хăнасем Л. Кураковăн тăван Ишек ялĕнче Тăван çĕршывăн Аслă вăрçинче пуç хунисене асăна лартнă палăкпа, вăхăтĕнче Раççейĕпе кĕрленĕ Пĕлỹ çурчĕпе паллашнă хыççăн Шăнкăртамри Фарид Чабатов фермерăн бассейнра осетр йышши пулăсем ĕрчетекен çĕнĕ объекчĕпе паллашрĕç. Вăхăтĕнче республикăра тĕрлĕ ведомствăра ĕçленĕ ертỹçĕсене кунта та тĕлĕнмелли пайтах пулчĕ. Фермер хăйĕн мехелĕпе пулăсем ĕрчетес тĕлĕшпе пуçăннă малашлăхлă проекта чылайăшĕ ырларĕ. Паянхи ку бассейнра пилĕк пин ытла пулă ỹсет.
Хаклав
Федор Карягин, старейшина Канашĕн членĕ:
"Пирĕн районта çакнашкал хастарсем тупăннине ырамалла çеç. Фарид Чабатов питĕ пысăк ĕçе пикеннĕ. Çакă экологи тĕлĕшпе те пĕлтерĕшлĕ. Аш-какайран юлнă каяшсем выртса, йăваланса çỹремеççĕ, пурте ĕçе кĕреççĕ.
Çавăн пекех старейшинăсем Турханти ХI Кокель пленэрне хупнă çĕре те хутшăнчĕç, Украинăран, Беларуçрен, Тутарстанран, Пушкăртсанран тата ытти çĕртен килнĕ профессилле художниксен куравĕпе паллашрĕç, ăна пысăк хак пачĕç.
Хаклав
Татьяна Бердникова, Раççей художникĕсен Союзĕн членĕ, Хусан:
"Эпĕ Вăрнар районĕнчи Кĕтеснерте çуралса ỹснĕ. Чăваш хĕрĕ. Çемье шăпи мана Хусана илсе çитерчĕ. Мăшăрăмпа иксĕмĕр те Чăваш Енти сумлă пленэра пĕрремĕш хут хăтшăнтăмăр. Симпозиум питĕ килĕшрĕ. Çĕннине, лайăххине нумай илтĕмĕр Турханта. Сăмах май каласан, пирĕн çемье _ художниксен çемйи. Мăшăр та, ачасем те пурте професилле ăстасем. Сăрă туртăмĕ виççĕмĕш ăрăва _ мăнуксене те_ куçрĕ.
Республикăри старейшинăсем хăйсен ĕçне Патăрьелĕнчи "Бизнес-инкубаторта" пĕтĕмлетрĕç. Патăрьел районĕн культурăпа патриотизизм тата халăха экологи воспитанийĕ парас ыйтупа йĕркеленĕ çавра сĕтел калаçăвне старейшина Канашĕн председателĕ Лев Кураков ертсе пычĕ. Тема модераторĕ Патăрьелĕнчи пĕрремĕш вăтам шкул директорĕ Н. Андреева пулчĕ. Район админисртраци пуçлăхĕн тивĕçне пурнăçлакан С. Чернова культурăпа патриотизм, экологи воспитанийĕ ку чухне пысăк пĕлтерĕшлĕ пулнине, çак тĕллвпе районта сахал мар ĕç тунине каларĕ, хăнасене ырă сĕнỹ-канашсемшĕн тав турĕ. Аслă çынсемпе çавра сĕтел тавра пуçарнă калаçу тĕл пулăва хутшăннă ял тăрăх пуçлăхĕсемшĕн те малшнехи ĕçре пысăк пулăшу пулĕ.
А. Егорова
АУ «Редакция Батыревской районной газеты «Авангард» Мининформполитики Чувашии