09:23 17 августа 2017 г.
Районти хуçалăхсенче вырма ĕçĕсем куллен-кун вăй илсе пыраççĕ. Çĕр ĕçченĕсем уяр кунăн кашни минучĕпе тухăçлă усă курма тăрăшаççĕ.
_ Кĕрхи культурăсем районта 4000 гектара яхăн. Вĕсене пухса çапассине вĕçленĕпе пĕрех. Хăш-пĕр хуçалăхсенче çурхисене тĕшĕлеме пикенчĕç. Тĕштырă тухăçĕ аван пырать. Çут çанталăкăн начар енĕ çуках иккен,_ тет район администрацийĕн пуçлăхĕ Р. Селиванов районти хуçалăхсенчи вырма ĕçĕсемпе паллашнă май.
"Красное знамя" ял хуçалăх предприятийĕнче комбайнсем кĕрхи туллăн юлашки гектарĕ çинче çаврăм хыççăн çаврăм тăваççĕ. Уй-хир "карапĕсемпе" Н. Черновпа Н. Анюров ĕçлеççĕ. Çĕнĕ тухăçа йĕтеме В. Чермасовпа А. Бакашин турттарать.
_ Пиçсе çитнĕ тырпула пухса кĕртме икĕ комбайн хутшăнать. Тепри те юсавлă. Çурхисене 600 гектар ытла çитĕнтернĕ. Кĕр мăнтăр пуласси куç умĕнче. Çĕр ĕçченĕн тăрăшуллă ĕçĕ сая каймарĕ,_ тет ывăç тупанĕ çинчи пучаха шĕкĕлчесе хуçалăх ертỹçи П. Никифоров.
Районти кирек хăш харпăрлăхлă хуçалăхра та ĕç çакнашкал пыни савăнтарать. "Колос" çĕрĕç фирминче, акă, Б. Думилин ертỹçĕ хăй штурвал умне ларнă. Комбайнерĕ курăк анинче ĕçлет-мĕн.
"Звезда" ял хуçалăх кооперативĕнче кĕрхи тулла маларах паккуспа вырса кушăхтарнă. Çапнă тухăç йĕтеме кĕрет. Ăна икĕ сортировкăпа тасатаççĕ. Тырă пахалăхĕ кĕлете кĕртме тивĕçтерет.
АУ «Редакция Батыревской районной газеты «Авангард» Мининформполитики Чувашии