26 июля 2008 г.
Ишлĕ ялĕ тинĕсрен аякра вырнаçнă пулин те хăйсен пурнăçне, çар службине Тинĕс-çар флочĕпе çыхăнтарнă çамрăксем чылай.
ХІХ ĕмĕр вĕçĕнче Иван Степанович Степанов (Иванов Григорий аслашшĕ) çар хĕсметне Хура тинĕс флотĕнче, Севастополь хулинче ирттернĕ.
Иртнĕ ХХ ĕмĕрте те ялтан чылай моряк тухнă. Александр Николаевич Ерофеев фашистсемпе Хура тинĕс флочĕн йышĕнче çапăçнă. Анчах та пĕр çапăçура сулахай урине амантнăскер шывран ишсе тухма вăй-хал çититерейменрен тинĕсе путнă. Василий Павлович Леонов тинĕс пехотин йышĕнче нимĕçсемпе кĕрешнĕ. Николай Владимирович Зверев çыран хÿтĕлевĕн матросĕ пулнă, Япони самурайĕсене тустарнă.
50-мĕш çулсенче Алексей Дмитриевич Сорокинпа Павел Андреевич Васильев Лăпкă океан флотĕнче, карапсем çинче, 4 çул службăра тăнă. Павăл тетен ывăлĕ Володя та çав флотрах 667-мĕш сериллĕ шыв ай кимми çинче виçĕ специальноçпа çар службине ирттернĕ. Мăнукĕ Максим матрос иртнĕ çул Санкт- Петербург хулинчен çар хĕсметне вĕçлесе таврăнчĕ.
Сильвестр Николаевич Федотов шкул пĕтерсенех Выборг хулинчи тинĕс пехотин çар училищине вĕренме кайнă. Училище хыççăн çамрăк лейтенанта Новороссийск хулине янă. Запаса тухсан Сильвестр Николаевич Ишлĕри вăтам шкулта çар ĕç (преподавателĕнче) ертÿçинче ĕçлерĕ.
Александр Иванович Киргизов 1965 çулта вăтам шкула лайăх паллăсемпе вĕçленĕ хыççăнах Çурçĕр флотне каять. Виçĕ çул хĕсметре пулнă хыççăн 1968 çулта Вольскри çар училищин Тинĕс-çар факультетне вĕренме кĕрет. 1971 çулта çар училищине хĕрлĕ дипломпа пĕтернĕ лейтенанта Лăпкă океан флотне службăна малалла тăсма яраççĕ. Тинĕс-çар офицерĕн Сирири тата Вьетнамри вăрçăсене те хутшăнма тивет. Вьетнамăн Кăнтăр-Китай тинĕсĕнчи пĕр çапăçура американецсен снарячĕ палуба çинче çурăлса каять. Снаряд ванчăкĕ Александр Ивановичăн пичĕ çинче ĕмĕрлĕх йĕр хăварать.
1986 çулта иккĕмĕш рангри капитана Севастополь хулине куçараççĕ. 1991 çулта паттăр офицер запаса тухать. Запасра пулсан та Севастополь хулинчех, Арсеналра ирĕклĕ служащи пулса тăрăшать.
70-мĕш çулсенче Михаил Николаевич Краснов атом шыв киммипе Баренц тинĕсĕнче ишнĕ. Пултаруллă подводник халĕ “Чебоксарыстройгаз” , “Микра” обществăсене ертсе пырать.
Олег Матвеев, Николай Егоров, Иван Федотов, Геннадий Кошкин мичман та çар морякĕсем.
80-мĕш çулсенче Алексей Денисов Балти флочĕн тинĕс пехотинче, Иван Карсаковпа Василий Родионов Лăпкă океан флотĕнче, 90-мĕш çулсенче Николай Зайцев Хура тинĕс, Виктор Андреев мичман Çурçĕр, Александр Красновпа Сергей Казеев Лăпкă океан флочĕн тинĕс пехотинче, Алексей Михайлов разведкăн пысăк карапĕ çинче контракт йĕркипе хĕсметре тăраççĕ.
Артемьев Алексей матрос–радист иртнĕ çул Çурçĕр флотĕнчен службăран таврăнчĕ.
В.ЗАЙЦЕВ.
Ишлĕ ялĕ.