16 августа 2008 г.
Чăваш Республики Кăнтăр Осетири гуманитари катастрофинче хур курнисене пулăшма хатĕр.
Республика санаторипе сывлăх комплексĕсенче çитĕннĕ 70 çынна тата 50 ачана вырнаçтарма хатĕр. Унта çăлăнăç шыраса килнисем валли мĕн кирли пурте пулать.
Республикăри сывлăхпа профилактика учрежденийĕсем гуманитари катастрофине пула асап тÿснĕ 30 ача тата 50 çитĕннĕ çын валли вырăн хатĕрленĕ.
Чăваш Республики çавăн пекех медикаментсемпе тата донор юнĕпе те пулăшать. Çавна май Шупашкарти юн илекен станцире вырсарникунсăр пуçне кашни кун 8 сехетрен пуçласа 12 сехетчен юн пама пулать. Вăл Пирогов урамĕнчи 9-мĕш çуртра вырнаçнă (“Ул. Т.Кривова” остановка). Илекен юн калăпăшĕ – 420 миллилитр. Çумра паспорт пулмалла. Донора апатланма 80 тенкĕ укçа, юн панă тепĕр куншăн хушма отпуск валли справка параççĕ.
Шупашкарти юн илекен станцие малтанхи кунах 110 çын пынă.