20 августа 2008 г.
Иртнĕ эрнере район пуçлăхĕ Н.Глухов хула строительстви тата обществăлла инфратытăм аталанăвĕн министерстви йĕркеленĕ канашлăва хутшăннă. Унта Патăрьелпе Шăмăршă, Вăрнар районĕсенче ушкăнлă шыв кĕртессипе проект, строительство ыйтăвĕсене пăхса тухнă. Канашлăва хула строительстви тата обществăлла инфратытăм аталанăвĕн министрĕ А.Гончаров ертсе пынă.
Республика умĕнчи “Чăваш Республикинчи халăха 2005-2008 çулсенче ĕçме юрăхлă шывпа тивĕçтересси” программăпа килĕшÿллĕн, района 3 йÿппе килекен шыв çулĕн проектне туса пĕтернĕ. Пĕрремĕшĕ – Сăкăт, Алманчă, Тутар Сăкăт, Кзыл Чишма, Чĕпкас, Красномайск, иккĕмĕшĕ – Патăрьел тата Шăнкăртам, виççĕмĕшĕ Катек, Çĕнĕ Ахпÿрт, Патăрьел, Кивĕ Ахпÿрт, Туçа, Анат Туçа, Тутар Тимеш ялĕсене çитет.
Районта шыва каялла сăхтарса илессипе пыракан строительство ĕçне те вĕçленĕ. Халĕ тата шыва тимĕртен тасатакан хушма оборудовани лартассипе тимлеççĕ. Çыхăнтару тата ытти вак-тĕвек тăрса юлнă.
Патăрьелĕнче пилĕк çăл куçа çаврасем лартнă. Шывпа тивĕçтерекен тата илсе каякан комплекса туса пĕтересси те вĕçленсе пырать.
(Хамăр корр.).