20 августа 2008 г.
Патăрьел ял тăрăхĕн администрацийĕ çĕнĕ çурта куçрĕ. Çак ятпа кунта халăх йышлă пухăнчĕ. Савăнăçлă мероприятие ял тăрăхĕн пуçлăхĕн тивĕçĕсене пурнăçласа пыракан В.Сельцов уçрĕ. Ун хыççăн район пуçлăхĕн пĕрремĕш çумĕ Р.Селиванов салам сăмахĕ каларĕ. Ял тăрăхĕн депутачĕсен Пухăвĕн председателĕ А.Ялуков администраци çуртлă-йĕрлĕ пулнăшăн хĕпĕртенине пĕлтерчĕ. Р.Селиванов, А.Ялуков, В.Николаев (унчченхи ял тăрăхĕн ертÿçи) хĕрлĕ хăйăва касрĕç.
Савăнăçа пытарма çук. Ял тăрăхĕн администрацийĕ “хваттерте” пурăнса йăлăхрĕ. Халĕ халăха йышăнма та кăмăллă. Ялăн социаллă-экономикăллă аталанăвне лайăхлатас ĕçре те çитĕнÿсем тума хавхалантаратех çакă.
Килнĕ хăнасем пушă алăпа мар. Вĕсем ĕçре усă курмалли парнесем сĕнчĕç. Зданипе, пÿлĕмсемпе паллашрĕç. Хăтлăхĕ кирек кама та илĕртет. Çурта шалтан евроюсав тунă, çĕнĕ сĕтел-пукан, компьютерсем туяннă. Хĕлле газпа хутса ăшăнаççĕ. Хăйсен котельнăйĕ пур. Картишĕ те çителĕклех.
Çурчĕ унчченхи Патăрьел типографийĕн пулнă. Çĕнĕ тунăран, “Авангард” хаçат редакцийĕ ăна республика патшалăх пурлăхĕ çине куçарнă. Ял тăрăх администрацийĕшĕн пысăк парне пулчĕ çакă.
Администраци Канаш урамĕнчи 22 номерлĕ çуртра вырнаçнă.
А.ИВАНОВА