20 августа 2008 г.
Акă ĕнтĕ шурă Шупашкарăмăр тепĕр çул ватăлчĕ – 539-а çитрĕ. Çав уява вăл шăматкунпа вырсарникун паллă турĕ.
Çак ятпа Шупашкар çыннисене Чăваш Республикин Президенчĕ Николай Федоров ăшшăн саламланă. Вăл тĕп хуламăр сарăлса, илемленсе, патварланса пынине палăртнă. Сывлăх, культура, вĕрентÿ çурчĕсем, хваттерсем ÿсе-ÿсе ларнинче Шупашкар çыннисен тÿпи пысăк. Президент хула çыннисене малашне те ÿсĕмлĕ ĕçлеме ырлăх-сывлăх суннă.
Хула кунĕ ячĕпе Шупашкарти культура учрежденийĕсенче, лапамсенче тĕрлĕ мероприятисем иртнĕ. Вĕсене Шупашкар ертÿçисемсĕр пуçне Николай Федоров Президент, ЧР Правительствин членĕсем хутшăннă. Хула çыннисем концертсем курса савăннă, спорт ăмăртăвĕсенче тупăшнă.
Уяв кунĕ илемлĕ салютпа вĕçленнĕ.