27 августа 2008 г.
Пушарсен сăлтавĕ – ача-пăча шăрпăкпа ашкăнни.
Çак кунсенче Упамсара пурăнакан Н.Сымова хуçалăхĕнче тăр кăнтăрлах пушар тухнă. Вут серепинче икĕ хутлă йывăç çурт çунса кайнă.
Патăрьелĕнчи Хлебниковсен хуçалăхĕнче те пушарта хуралтисем юрăхсăра тухнă. Районти пушар хуралĕнчен пĕлтернĕ тăрăх, инкексен сăлтавĕсем – ача-пăча шăрпăкпа ашкăнни. Юрать-ха кил хуçисем çурт-йĕрне инкек-синкекрен страхланă.
Нумаях пулмасть тата Сăкăтра электрооборудовани юсавсăррине пула комбайна вут хыпса юрăхсăра тухнă. Ку ыйтупа механизаторсен асăрхануллă пулмалла.
Районĕпе çулталăк пуçланнăранпа вут-кăварпа çыхăннă 28 инкек пулнă, вĕсенче пилĕк çыннăн пурнăçĕ татăлнă. Ытларах Патăрьел, Турхан ял тăрăхĕсенче пушар тухнă. Çавăнпа та ку тĕлĕшпе çынсен тимлĕхе ÿстермелле.