24 сентября 2008 г.
Чăваш Енре тăваттăмĕш хут çĕр-шывра чи массăллă спорт ăмăртăвĕсенчен пĕри – “Нацисен кросĕ-2008” иртнĕ. Ăмăртусен вырăнĕсем – Шупашкарпа Çĕнĕ Шупашкар. Старта 5 çултан пуçласа 85 çулхи спорта юратакансем 20 пин çын ытла тăнă. Çемьепе ăмăртакансем те йышлă пулнă.
Спорт, илемлĕхпе сывлăх уявĕпе ăмăртăва хутшăнакансене Чăваш Республикин Министрсен Кабинечĕн Председателĕ Сергей Гапликов саламланă. Çавăн пекех спортсменсене Елена Николаева, Вера Андреева тата Татьяна Сибилева олимпийкăсем ÿсĕмсем суннă. Ун хыççăн ăмăртăвăн тĕп судйи ХХVII çуллахи Олимпиадăн бронза призерĕ Владимир Андреев старт панă.
Ăмăртура предприятисемпе организацисен представителĕсем, студентсем, шкул ачисем 1, 4, 6, 8 тата 12 километрлă дистанцисенче тупăшнă. Власть органĕсен ертÿçисем, ЧР Патшалăх Канашĕн депутачĕсем, паллă спортсменсем 2014 метра чупса вăй виçнĕ. VIР-тупăшура финиша малтисен шутĕнче ЧР Культура, национальноçсен ĕçĕсен, информаци политикин тата архив ĕçĕн министрĕ Роза Лизакова, Вĕрентÿпе çамрăксен политикин министрĕн çумĕ Валерий Устяк, ЧР Патшалăх Канашĕн депутачĕ Елена Николаева çитнĕ.