27 сентября 2008 г.
Ялта пурăнакансем Патăрьелĕн кăнтăр енче вырнаçнă “Агрохимия” тулли мар яваплă пĕрлешÿ территорийĕнче сентябрĕн 19-мĕшĕнче 15 сехетсенче ВАЗ-2114 автомобиль капочĕ айĕнчен тата салонĕнчен хура тĕтĕм мăкăрланнине асăрханă. Куракансем вут-çулăма хăйсем тĕллĕн сÿнтерме хăтланнă, анчах çулăм парăнман. Унсăр пуçне взрыв пулас хăрушлăх та умрах пулнă. Çавăнпа районти пушар хуралне пĕлтерме тивнĕ. Хăвăрт çитнĕ пушарнăйсен ушкăнĕ вут-кăвара сÿнтернĕ. Вĕсен вăр-варлăхне курах взрыв пулман. Пушарнăйсем çулăма бензин бакĕ патне çитме паман. Инкеке тишкерни автомобилĕн малти пайĕ пысăк хĕрÿлĕхе пула вăйлах сиенленнине çирĕплетнĕ.
Çак пулăм пирки шалти ĕçсен пайне тата Патăрьелĕнчи районсем хушшинчи следстви пайне те хыпар çитернĕ. Вĕсем инкек вырăнне çитсе çакна палăртнă: машина салонĕнче çын вилли пур. Вăл 1956 çулта çуралнă Шăнкăртам çынни иккенне те палăртма май килнĕ. Судпа медицина тишкерĕвĕ хыççăн М.М.Шарипов сĕрĕм тивнипе пурнăçран уйрăлни çирĕпленнĕ.
Ку факт тăрăх Патăрьелĕнчи районсем хушшинчи следстви пайĕ Раççей Федерацийĕн Уголовлă процесс кодексĕн 144-145 статйисемпе килĕшÿллĕн вилĕм сăлтавне пур енлĕн тата тĕплĕнрех палăртас енĕпе тĕрĕслев ирттерет.
В.КОННОВ, следстви пайĕн ертÿçин çумĕ, I класлă юрист.