01 октября 2008 г.
Пĕтĕм тĕнчери ватă çынсен кунне халалласа Патăрьелĕнчи социаллă тивĕçтерÿ центрĕ çулсеренех шашка-шахмат турнирĕ ирттерет. Кăçал та ку йăлана пăсмарĕç. Иртнĕ эрнере центра шашка-шахмат спортне юратакансем йышлăн пухăнчĕç. Вĕсене Чăваш Республикин Сывлăх сыхлавĕпе социаллă аталану министерствин Патăрьелĕнчи социаллă хÿтлĕх пайĕн начальникĕ Ф.Майорова, Социаллă тивĕçтерÿ центрĕн директорĕ Т.Малинина уявпа саламларĕç, çирĕп сывлăх, ăнăçусем сунчĕç.
15 ватă спортсмен тупăшрĕ шашка-шахмат хăмисем çинче. Пĕтĕм итогсем тăрăх пĕрремĕш вырăна Н.Трофимов (Патăрьел) йышăнчĕ. Иккĕмĕшпе виççĕмĕш вырăнсенче – М.Абдуллинпа (К.Чишма) Ф.Ларионов (Сăкăт). Призлă вырăнсене йышăннисем Хисеп хучĕсемпе парнесене тивĕçрĕç. Пухăннă мĕн пур маттур ватăсене уяв апачĕпе чысларĕç.
А.САЛМИН.