08 октября 2008 г.
Кăçалхи июлĕн 12-мĕшĕ –Питрав кунĕ районшăн та, Первомайск ял тăрăхĕнчи халăхшăн та истори страницине çырăнса юлчĕ. Чăваш Республикин Президенчĕн “Чăваш Республикинче обществăлла инфраструктурăна малалла аталантармалли çинчен” указне пурнăçа кĕртес тĕллевпе, район пуçлăхĕн хушăвĕпе килĕшÿллĕн ял тăрăхĕсем хушшинче йĕркеленĕ конкурс условийĕпе çĕнтерсе кашни çулах ирттерме палăртнă Район кунне пуçласа Первомайскисем çĕнсе илнĕ. Пысăк пĕлтерĕшлĕ канупа спорт, юрă-ташă, вăйă-кулă, хаваслăх, ăмăрту паттăрĕсене чысланă уяв мĕнле хĕрÿлĕхпе иртнине унта хутшăннисем пурте ас тăваççĕ-тăр. Ун çинчен район хаçатĕнче те тĕплĕн çутатнăччĕ. Патăрьел районĕн пĕр кунĕ Первомайскинче иртнин пĕлтерĕшĕ те, усси те çав тери пысăк пулни, çакăн пек ырă ĕçсене вырăнта йĕркелени уявчченех сисĕнчĕ. Ял халăхĕ граждансен пухăвĕнче çак хыпара илтнĕ хыççăнах паллă куна хатĕрленме тытăннă. Пĕр енĕпе çеç мар, пур енĕпе те. Çак тапхăрта культура ĕçченĕсем те, депутатсем те, ку енĕпе ĕçлекен ятарлă комисси те канлĕхе çухатнă. Пĕрремĕш хут иртекен пĕлтерĕшлĕ мероприяти пушшех хăратать-çке.
Район кунне Первомайскинче ирттернишĕн çак тăрăхри халăх паян кунччен тивĕçлĕ çынсене тав тăвать. Мĕншĕн тетĕр-и; Чăн малтанах конкурс условийĕпе килĕшÿллĕн район пуçлăхĕн Н.Глуховăн йышăнăвĕпе Аслă Арапуçсене хăнасене кĕтсе илме пур енлĕ хăтлăх кÿме çур миллион укçа уйăрнă. Урăхла каласан, Первомайскисемшĕн çакă пысăк парне темелле. Тĕллевлĕ укçапа вĕсем чылай вырăна тирпей-илем кÿнĕ. Чăн малтанах стадиона палласа илмелле мар улăштарса капăрлатнă. Унта паян республика шайĕнче ăмăрту ирттерме те вăтанмалла мар. Тахçантанпах çăрăлакан Овражная урамри çула вĕтĕ чул сарса тирпейленĕ. Çак уяв сăлтавĕпех Ленин урамĕнчи çула асфальт сарнă, çул айккине йĕркене кĕртнĕ тата ытти те. Урăхла каласан Район кунне вырăна тухса ирттерни Республика кунне районсенче йĕркеленĕ пекех. Çакна ырламалла çеç.
Çитес çул çакнашкал уяв тепĕр ял тăрăхĕнче иртмелле. Конкурса хутшăнма вырăнти администраци пуçлăхĕсен комиссине ял тăрăх пурнăçĕ, ĕçĕ-хĕлĕ, кунти предприяти-организацисен аталанăвĕ тата ытти те пирки кирлĕ хутсем тăратмалла. Район пуçлăхĕн йышăнăвĕпе конкурс докуменчĕсене комиссине çитермелли юлашки срок октябрĕн 1-мĕшĕ пулнă. Кун çинчен ял тăрăх пуçлăхĕсем пурте лайăх пĕлеççĕ. Анчах та маларах асăннă кун тĕлне районти 19 ял тăрăх пуçлăхĕнчен Алманчăсемпе Туçасем (ял тăрăх пуçлăхĕсем Г.Фомин, Н.Перепелкин) çеç çак конкурса хутшăнма хыпăнса ÿкнĕ. Ытти ял тăрăх пуçлăхĕсем çав тери хулăн ÿтлĕ-ши е вĕсем район пуçлăхĕн йышăнăвне нимĕн вырăнне те хумаççĕ; Калăн, конкурса хутшăнма кăмăл туман тата ял тăрăхĕсенче пурте тирпейленсе, йĕркеленсе пĕтнĕ.
Иртнĕ эрнере комисси членĕсем конкурс срокне тепĕр эрнене тăснă. Çакăн хыççăн та ял пуçлăхĕсем те сиксе ÿкмеççĕ-ши;
А.НИКОЛАЕВА.