08 октября 2008 г.
Районта “Ĕç ветеранĕ” тата “Чăваш Республикинчи ĕç ветеранĕ” ятсене парас ĕç малалла пырать. Хальхи вăхăтра Юхма тăрăхĕнче 6 пин ĕç ветеранĕ пурăнать, вĕсенчен Чăваш Республикин ĕç ветеранĕсем – 33 çын.
Иртнĕ эрнере район пуçлăхĕн пĕрремĕш çумĕ Р.Селиванов ял тăрăхĕсенчи виçĕ ĕçчене ветеран удостоверенийĕсене панă. Вĕсенчен В.Храмова Пăлапуç Пашьел ял тăрăх специалисчĕ пулса ĕçленĕскер, С.Вахитова Ыхра Çырми ял тăрăх специалисчĕ, Р.Алигберова Хирти Пикшик ял тăрăхĕнче специалистра ĕçленĕскер. Рузалия Фасхутдиновна Алигберовăна “Чăваш Республикин ĕç ветеранĕ” удостоверенине парса чысланă. Малашлăх хисепĕ тата та пысăкрах. Районти халăха социаллă хÿтлĕх паракан уйрăм ăна çак ята Раççей шайĕнче пама хутсем тăратнă.
Р.Алигберова çак чыса чăнласах та тивĕçлĕ. Унăн пĕтĕмĕшле ĕç стажĕ 36 çул. Вĕсенчен вуннăшне вăл ăрат енĕпе ĕçлекен зоотехник-инспекторта тимленĕ. 1981-2006 çулсенче счетовод-кассирта, ял тăрăх специалистĕнче тăрăшнă.
Тÿрĕ чунлă хĕрарăмăн ĕçне тĕрлĕ шайра хак панă. Вăл ЧР Президенчĕн Хисеп хутне, ЧР Финанс Министерствин Хисеп хутне тивĕçнĕ, “За активное участие во Всероссийской сельскохозяйственной переписи 2006 года” знакпа наградăланă. Урăхла каласан тивĕçлĕ çынна – тивĕçлĕ хисеп.