15 октября 2008 г.
Юпан 13-мĕшĕнче район пуçлăхĕ Н.Глухов райадминистрацин структура подразделенийĕсен ертÿçисемпе черетлĕ планерка ирттернĕ.
Чи малтанах Николай Иванович Чăваш Республикин Министрсен Кабинечĕн Председателĕн çумĕ, Чăваш Республикин Ял хуçалăх министрĕ М.Игнатьев ертсе пыракан делегаци йышĕнче Мускав хулинче Раççейри ял хуçалăхĕпе продукци тирпейлекен промышленноçра ĕçлекенсен уявĕпе çыхăннă мероприясенчи, Пĕтĕм Раççей куравĕн центрĕн “Ылтăн кĕркунне” куравĕнчи самантсемпе паллаштарнă.
Планеркăра райадминистраци пайĕсен иртнĕ эрнери ĕçĕ-хĕлне, районăн социаллă-экономикăллă аталанăвне пĕтĕмлетнĕ, умра тăракан тĕллевсене çивĕчлетнĕ.
Иртнĕ эрнере ГИБДД ĕçченĕсем районти вĕрентÿ учрежденийĕсенчи шкул автобусĕсене тĕрĕсленĕ май автобус водителĕсемпе, шкул ертÿçисемпе, социаллă педагогсемпе профилактика ĕçĕ ирттернĕ, асăннă транспортпа çыхăннă йĕркесене пăхăнасси, вĕренекенсене автобуспа илсе çÿренĕ чухне мĕн пур нормативлă право акчĕсене пăхăнмалли çинчен çирĕп каланă.
Планеркăра район депутачĕсен Пухăвĕн черетлĕ ларăвĕнче йышăннă программăсене те хускатнă. Çавăн пекех хутмалли тапхăрпа çыхăннă ыйтусене те çивĕчлетнĕ.