15 октября 2008 г.
Патăрьел районĕн культурăпа кану центрĕн методисчĕ Ф.Абитов ертсе пынипе Шăнкăртамри культура çуртĕнче республикăри XVI “Рамазан-2008” фестиваль иртрĕ. Унта тутар эстрада юррисемпе ташшисене кăмăллакансем хутшăнчĕç. Ку фестиваль тĕллевĕ – Чăваш Енре пурăнакан тутарсем хушшинчи çĕнĕ талантсене палăртасси, халăх йăли-йĕркине упраса аталантарасси, хăй тĕллĕн вĕреннĕ юрă-ташă ăстисене, коллективсене вăйлăрах аталанма пулăшасси. Фестиваль учредителĕсем: Чăваш Республикинчи мăсăльмансен тĕн управленийĕ, Патăрьел районĕн культурăпа кану центрĕ, Шăнкăртам ял тăрăхĕн администрацийĕ.
Хальхинче республикăри фестивальре Шăмăршă, Комсомольски, Елчĕк, Патăрьел районĕсенчи юрă-ташă ăстисемпе коллективĕсем хăйсен пултарулăхне кăтартрĕç. Шăнкăртам культура çурчĕн сцени кунĕпех пушă тăмарĕ: юрă хыççăн юрă шăранчĕ, уйрăм çынсене ушкăнсем ылмаштарчĕç, ташă кĕввисем куракансене лăпкăн ларма “чăрмантарчĕç”. Çавăнпах кашни номер хыççăн тăвăллăн алă çупни кĕрлесе тăчĕ.
Çĕнтерÿçĕсене номинацисем тăрăх палăртрĕç пулин те тÿресене çăмăл килмерĕ: пĕринчен тепри ăстарах халăхран тухнă талантсем.
“Эстрада юрри” номинацире 14 çул тултарманнисем хушшинче Гелия Хасянова (Хирти Пикшик) мала тухрĕ. Шăнкăртамри Алсупа Гельсу Хайбулловсен çемье дуэчĕ иккĕмĕш вырăнта. Çак ялти Алмаз Халитов виççĕмĕш парнеллĕ пулчĕ. 14 çулран аслăраххисен хушшинче “Мишар” ансамбль (Комсомольски районĕ) çĕнтерчĕ, Гелия Салихова (Тутар Сăкăт) иккĕмĕш вырăнта, Румия Давлетшина (Елчĕк районĕ) виççĕмĕшĕнче.
“Тутар ташши” номинацире тупăшакансем йышлăн пулчĕç. Çавăнпа та Шăмăршă районĕнчи Виçпÿрт Шăмăршăри ташă ушкăнне çĕнтерме йывăр килчĕ. Шăнкăртам вăтам шкулĕн ташăçисем иккĕмĕш вырăнта, виççĕмĕшĕнче Шăмăршăри “Фламинго” ушкăн.
Çамрăк мăсăльмансем хушшинче юрă-ташă ăсталăхне сарса аталантарас тĕллевпе тепĕр номинаци те кĕртнĕ кăçал. Вăл – “Мăсăльман юрри”. Кунта Комсомольски районĕнчи çичĕ çулхи Эльвира Габитова пурне те тĕлĕнтерчĕ. Гузель Хасянова (Хирти Пикшик) ун хыççăнхи вырăна тухрĕ. Виççĕмĕш вырăнта – Тутар Сăкăтри “Хамида” ушкăн.
Фестивалĕн чи аслă парнине – Гран-прие Шăнкăртам çамрăкĕ Хусанти культурăпа искусство институчĕн студенчĕ Рамис Халитов çĕнсе илчĕ. “Куракансем кăмăлланăскер” парнене 15 çулхи Шăнкăртам каччи Азат Абитов тивĕçрĕ.
Çĕнтерÿçĕсене, призерсене, фестивале хутшăннисене Чăваш Республикинчи мăсăльмансен тĕн управленийĕн Председателĕ Альбир Крганов ăшшăн саламларĕ. Фестивале ирттерме “Булат” пĕрлешÿ ертÿçи Ринат Абдулвалеев, ДПМК ертÿçи Минзагит Резепов тата ытти те витĕмлĕ пулăшрĕç.
А.АЛЕКСЕЕВ.