18 октября 2008 г.
Районти ял хуçалăх предприятийĕсен ертÿçисен канашлăвĕ иртнĕ. Унăн ĕçне район пуçлăхĕ Н.Глухов хутшăннă, тухса калаçнă.
Канашлăва хутшăннисем ял хуçалăх техникине хĕл каçарма хатĕрлес, тракторпа машина паркĕсенчи лару-тăру, ĕç укçи тата ытти тĕрлĕ ыйтăва хускатнă.
Ял хуçалăх техникине хуçалăхсенче хĕл каçма еплерех хатĕрленнине палăртас тĕллевпе октябрĕн 1-20-мĕшĕсенче смотр-конкурс иртет. Çак тапхăрта техникăна хĕл каçарма лайăх хатĕрленнине, тавралăха тимĕр-тăмăртан тасатнине, ĕçлев сыхлавĕпе хăрушсăрлăх техникине мĕнлерех пурнăçланине тĕрĕслеççĕ.
Ял хуçалăхĕнче вăй хуракансен вăтам ĕç укçи 5560 тенкĕпе танлашать (пĕлтĕрхинчен 43 процент пысăкрах).
Хальхи вăхăтра хуçалăхсенче уйра пахча çимĕçпе сахăр кăшманĕ юлнă. Часах вĕсене те пухса кĕртĕç.
Ял хуçалăхĕпе продукци тирпейлекенсен кунне районта октябрь уйăхĕн 31-мĕшĕнче уявлĕç. Унччен ĕç паттăрĕсене хуçалăхсенче чыслама палăртнă.
А.ИВАНОВ.