18 октября 2008 г.
Юнкун, октябрĕн 15-мĕшĕнче, районта кашни уйăхра халăхпа куçа-куçăн тĕл пулса калаçмалли, вĕсене кăсăклантаракан ыйтусене татса памалли ятарлă кун – информаци кунĕ пулчĕ. Хальхинче кун йĕркинчи ыйтусене сÿтсе явма республикăри профсоюзсен пĕрлешĕвĕн председателĕ А.Коршунов, ЧР Физкультурăпа спорт, туризм министр çумĕ С.Мельников, ЧР Патшалăх Канашĕн депутачĕ, “Чебоксарский строитель” уçă акционерла общество генеральнăй директорĕ В.Дмитриенко, “Чувашия” издательство-полиграфи комплексĕ” патшалăх унитарлă предприяти директор çумĕ В.Андреев хутшăнчĕç.
Информаци кунĕнче тĕпрен илсен 2009 çул валли тата 2010, 2011 çулсенчи планлă тапхăра йышăннă республика бюджечĕ, республикăри ĕç тăвакан тата вырăнти самоуправлени органĕсем 2008-2009 çулсенчи хĕллехи хутмалли тапхăра ăнăçлă ирттерсе ямалли пирки калаçусем пычĕç.
Кун йĕркинчи ыйтусемпе чăн малтанах район пуçлăхĕ Н.Глухов тухса калаçрĕ. Николай Иванович республика бюджечĕ экономикăна тĕреклетес, халăх пурнăçне лайăхлатас тĕллевсемпе çыхăннине каларĕ. Çакă вара тÿрреммĕнех район ĕçченĕсен малашлăхĕпе çыхăннă.
Район бюджечĕ те социаллă-экономикăллă аталанăвĕн ырă енĕсен никĕсĕ çинче йĕркеленнĕ темелле. Паянхи куна пирĕн район малашлăхпа çыхăннă тĕрлĕрен тĕллевлĕ программăсене, республика Президенчĕн Н.Федоровăн экономикăпа паянхи инфраструктурăна аталантармалли Указсене ăнăçлă пурнăçласа пырать. Ку тĕлĕшпе чăнах та, республика ертÿçи чĕлхипе хак парсан, пирĕн район ыттисемпе танлаштарсан пур енĕпе те “пилотлă” шутланать. Информаци кунне хутшăннисене районăн экономикăпа социаллă аталанăвĕпе паллаштарнă май, район пуçлăхĕ Н.Глухов тепĕр ырă хыпар та пĕлтерчĕ. Пирĕн район республикăри сывлăх министерстви йĕркеленĕ демографи аталанăвĕпе çыхăннă конкурса хутшăнса çĕнтернĕ. Çакă вара пире каллех ача çуратакан амăшĕсем валли çĕнĕ çурт тума çул уçса парать. Урăхла каласан тăрăшакансене республика ертÿçисем те алă тăсаççĕ.
Информаци кунне хутшăннисене район пуçлăхĕ Н.Глухов çывăх вăхăтра районти кивелнĕ çичĕ шкула çĕнетмелли, çитес çул “Таса шыв” программăна пуçласа районти тĕп больница таврашĕнче, кайран ытти урамсенче, ялсенче ĕçе кĕртесси пирки тĕплĕн чарăнса тăчĕ.
Республикăри профсоюзсен пĕрлешĕвĕн председателĕ А.Коршунов кун йĕркинчи ыйтусене сÿтсе явма хутшăннă май, Патăрьелсен пурнăç аталанăвне лайăх хак пачĕ, кашни ĕçлекен çыншăн профсоюзăн обществăлла организацийĕ пысăк шанăç, тĕрев, хÿтлĕх пулнине каларĕ. Çакна тĕпе хурсах район пуçлăхĕ Н.Глухов, районти профсоюзсен координаци совечĕн председателĕ Л.Кузнецова, районта ĕçпе тивĕçтерекенсен пĕрлешĕвĕн председателĕ М.Сепперов пĕрле килĕштерсе, ăнланса ĕçлеме 2008-2011 çулсем валли виçĕ енлĕ килĕшÿ çине алă пусрĕç.
Информаци кунĕн иккĕмĕш пайĕнче ятарлă ушкăнсем вырăнсене çитсе халăхпа курнăçрĕç, вĕсене кăсăклантаракан ыйтусене хуравларĕç. Район пуçлăхĕн пĕрремĕш çумĕ Р.Селиванов, ЧР Физкультурăпа спорт, туризм министрĕн çумĕ С.Мельников район центрĕнчи ачасемпе çамрăксен спорт шкулĕнче, “Паттăр” физкультурăпа спорт комплексĕнче пулчĕç, массăллă спорта аталантарас, уйрăм спортсменсемпе ĕçлес, çынсен сывлăхне çирĕплетес ĕçсем мĕнле пынипе интересленчĕç, çывăх вăхăтра пĕрремĕш спортсменсене йышăнма хатĕрленекен Патăрьелĕнчи стадионта пулчĕç.
Николай Иванович Глуховпа Анатолий Валентинович Коршунов ДРСУ ĕçченĕсем тăвакан “Первомайск–Пÿртлĕ–Сител” автоçулти ĕçсемпе паллашрĕç, Первомайск ял тăрăхĕнчи организацисемпе предприятисенче, вĕрентÿ, сывлăх учрежденисенче пулса котельнăйсем хĕле мĕнле хатĕррине пăхрĕç, кашни ĕç коллективĕпех тĕл пулса калаçрĕç.
“Чувашия” издательство- полиграфи комплексĕ” патшалăх унитарлă предприяти директор çумĕ В.Андреев “Авангард” хаçат ĕçченĕсемпе тĕл пулчĕ, кăсăклантаракан ыйтусем çине хуравларĕ.
А.ЕГОРОВА.