22 октября 2008 г.
Йывăр атлетика енĕпе Чăваш Республикинче мала тухассишĕн черетлĕ ăмăрту Çĕмĕрлере иртрĕ. Патăрьел районĕн чысне районти ачасемпе çамрăксен спортшкулĕн команди хÿтĕлерĕ.
Хальхи вăхăтра спортшкул филиалĕсем Алманчăра, Нăрваш Шăхалĕнче тата Патăрьелĕнче ĕçлеççĕ. Тимĕр спорт снарячĕпе туслашма, ăсталăха туптама, йывăр атлетикăн вăрттăнлăхĕсене алла илме, сывă пурнăç йĕркине хăнăхма ачасене Н.Зимин, А.Давыдов, Н.Трифонов тренер-преподавательсем пулăшаççĕ.
Çирĕп режимпа тренировкăсем туни ахаль иртмен. Çакна спортшкул воспитанникĕсем Çĕмĕрлери ăмăртура аван кăтартса пачĕç. Çивĕч тупăшура пирĕн команда республикăра виççĕмĕш вырăна тухма пултарчĕ. Малти вырăнсенче – Улатăрсемпе Елчĕксем.
Уйрăм спортсменсене палăртасах килет. Акă, Александр Мышов (Алманчă) 38 кг виççеллисем хушшинче пĕрремĕш, Дмитрий Давыдов (Н.Шăхаль) 65 кг виçеллисем хушшинче иккĕмĕш, унăн юлташĕ Анатолий Пагунов (65 кг) виççĕмĕш вырăнсене йышăнчĕç, команда валли кирлĕ очкосем пуçтарчĕç.
Унчченрех йывăр атлетика арçынсен спорчĕ кăна шутланнă пулсан, юлашки çулсенче штангăна хĕр ачасем те парăнтарма пуçларĕç. Çĕмĕрлери ăмăртура пирĕн командăри Мария Игнатьева (53 кг) тата Рузика Яфизова (58 кг) пĕрремĕш, Марина Ерофеева (53 кг) тата Майя Камасова (48 кг) иккĕмĕш вырăна тухса хăйсен малтанхи пысăк çитĕнĕвĕсене турĕç.
В.КУЗЬМИН.