29 октября 2008 г.
Поэзи каçалăкĕнче хăйсен вырăнне тупнă хастарсем çавра сĕтел тавра пуçтарăннă. “Мехел” клубăн йышĕ кашнийĕнчех ÿснĕçемĕн ÿссе пырать. Хальхинче те тĕп библиотекăн вулав залĕ туллиех халăхпа тулнă. Мехелçĕсем ларура хăйсен çĕнĕ сăввисене сÿтсе явнă, вĕсене вуланă, пĕр-пĕрне ырă канаш-сĕнÿ панă.
Клуб ертÿçи В.Алексеева хастар членсене Л.Сорокинăпа Р.Родионовăна çур ĕмĕрхи юбилейпа саламланă. Юбилярсем те тĕл пулăва пушă алăпа килмен. Вĕсем хăйсен çĕнĕ материалĕсемпе паллаштарнă, сăввисене вуланă. Г.Хлебниковăпа М.Иванова юбилярсене юрăпа саламланă. Библиотека ĕçченĕ Н.Мазякова Марина Карягина ентешĕн “Юрăсăр уй” çĕнĕ сăвă кĕнекипе паллаштарнă. Клуб членĕсем икĕ сехет ытла поэзи тĕнчинче пулса киленнĕ.