29 октября 2008 г.
Çак ваттисен сăмахне манăн хамран кĕçĕнрех е кăшт аслăрах çамрăксене калас килет. Ĕç опычĕ пысăках мар пулин те, эпĕ çакна туйрăм та, ĕнентĕм те. Виçмине ра-йон ĕçченĕсем ял хуçалăхĕпе апат-çимĕç промышленноçĕнче ĕçлекенсен уявне паллă тăваççĕ. Диплом илнĕ специальноçпа (кулинара вĕреннĕ) пулсан та çак кун маншăн çывăх. Шăпа мана тепĕр ĕç шанса пачĕ. Çичĕ çул эпĕ Ленин ячĕллĕ çĕр ĕç фирминче ĕне-выльăх ферминче ĕçлерĕм. Анне ĕмĕрĕпе такăрлатнă сукмак илсе çитерчĕ мана чĕлхесĕр янаварсем патне. Ача чухне ĕне сума пулăшма çÿреттĕм. Ун чухнех çывăхчĕ мана çак ĕç. Анне выльăхсемпе пĕр чĕлхе тупса калаçса çÿрени килĕшетчĕ.
Халĕ эпĕ вăхăтлăха килте, виççĕмĕш ачапа ларатăп. Çак вăхăтра та эпĕ хамăн ĕç коллективĕшĕн, выльăхсемшĕн тунсăхларăм. Хама шанса панă ĕçе, манăн ĕçĕме хуçалăх ертÿçисем тăрăшнипе тивĕçлипе хак панине тата ытларах тÿрре кăларас килет. Çемье тата Ырă ĕçсен çулталăкĕнче пирĕн хуçалăхран çĕр ĕç фирминче тăрăшакан тата икĕ çамрăкăн кандидатурине Чăваш Республикин Президенчĕн Н.Федоровăн ятран паракан стипенди илме кандидата тăратнăшăн та савăнтăм. Вĕсем ман пекех стипендиат пуласса шанатăп, эстафета “патакне” вĕсене паратăп.
Н.ПАВЛОВА,
ЧР Президенчĕн стипендиачĕ.