29 октября 2008 г.
Шăматкун, октябрĕн 25-мĕшĕнче район пуçлăхĕн призне çĕнсе илессишĕн çăмăл атлетсен кĕркуннехи эстафети иртрĕ. Йăлана кĕнĕ ăмăртăва уçма район пуçлăхĕн çумĕ – строительствăпа обществăлла инфраструктура аталанăвĕн пай пуçлăхĕ И.Дикин, вĕрентÿ пайĕн пуçлăхĕн çумĕ Н.Афанасьев, Патăрьелĕнчи ачасемпе çамрăксен спорт шкулĕн директорĕ В.Платонов хутшăнчĕç. Ăмăрту стартне ясли-садри пулас спортсменсем, районти вĕрентÿ учрежденийĕсенчи тĕрлĕ çулхи шкул ачисем, предприяти-организацисенчи хĕрарăмсемпе арçынсен ушкăнĕсем, ял тăрăхĕн, ял, хуçалăх предприятийĕсен, райадминистраци уйрăмĕсен, республикăпа федераллă служба подразделенийĕсен спортсменĕсем черетпе тăчĕç. Эстафетăна спорта юратакан 400-е яхăн хастар хутшăнчĕ.
Хăйсен ушкăнĕсенче пĕрремĕш вырăна Патăрьелĕнчи пĕрремĕш вăтам шкул, Первомайскинчи вĕрентÿ центрĕ, Анат Тăрмăшĕнчи ача сачĕ, Еншикри, Упамсари кĕçĕн классен шкулĕсем, аслисенчен спорт шкулĕ, Первомайски ял тăрăхĕ, райшалĕçпайĕ, Аслă Чемен ял тăрăхĕ çĕнсе илчĕç. Çĕнтерÿçĕсене пурне те Хисеп хучĕпе тата парнепе чысларĕç.
А. Николаева.