15 ноября 2008 г.
Çĕнĕ хаçат-журналпа пĕрлех тавар та килчĕ ку хутĕнче почта уйрăмне. Курупки-курупкипе кĕпе çумалли порошок, яшка пĕçермелли хатĕрсем, ручка-кăранташ, вырăн çи хатĕрĕ таранчченех пур кунта. Пылак апат-çимĕç те çителĕклех. Саманине кура почта ĕçченĕсен сутуçăнах çаврăнма тиврĕ. Таварсене тирпейлĕн шутласа йышăнчĕ Анат Туçари почта уйрăмĕн ертÿçи В.Горшкова. Вĕсене çÿлĕксем çине хакĕсене çырса вырнаçтарса хучĕ. Çак ĕçе тума Валентина Николаевнăна Р.Хафизовăпа С.Лапина почтальонкăсем те пулăшрĕç. Хăш-пĕр çĕнĕ таварсене вĕсем сутлăх илчĕç. Тутлă шăршлă супăньсене пенси илекен ватăсем хапăлласах туянаççĕ. Хăйсене кирлисене заказ та параççĕ. Хул урлă çакакан почтальонка сумкисем туллиех пулчĕç иккĕшĕн те. Паян тата хаçачĕ те ытларах. Кăмăллăн ăсатса ячĕ вĕсене ял çине В.Горшкова. Резида Ряшитовнăпа вунă çул ытла килĕштерсе ĕçлет Валентина Николаевна. Ĕçе те хăех илнĕччĕ ăна. Маларахри пенсие тухнă хыççăн эрне ытла почтальонка шырарĕ. Кулленхи почтăна ĕç хыççăн хăй валеçрĕ. Никам та килĕшекен çук. Яваплă ĕçе явăçма пурте иккĕленеççĕ. Хаçат-журнал салатасси çеç мар вĕт. Çур çултан çур çула çырăнтару ирттермелле. Пенси, пособи укçисене вăхăтра çитермелле. Çăмăллăхпа усă куракансен тÿлевĕсене пĕлмелле тата ытти те. Çавăнпа Резида Ряшитовна та килĕшесшĕнех пулмарĕ малтан. Унăн кăмăлне çавăрма май тупрех В.Горшкова.
– Çак пукан çине ларни 2009 çулхи май уйăхĕнче шăпах 25 çул çитет. Пенсие те тухатăп. Ĕçĕ вара çăмăл мар. Хăнăху пурри çеç ăнăçу кÿрет. Пуçпа та, алăпа та, чĕлхепе те ĕçлемелле. Кун каçиччен миçе çын ыйтăвне тивĕçтермелле, – калаçать Валентина Николаевна.
Чăнах та халăх йышлă çÿрет почтăна. Перекет уйрăмĕ çук ялта, çавăнпа электричествăпа, газпа усă курнăшăн укçине кунта тÿлеççĕ. Телефоншăн та кунтах татăлмалла тунă. Ырăпа калаçаççĕ ял çинче почта ĕçченĕсем çинчен. Пурте хисеплĕ мăшăр, юратнă аннесем вĕсем. Валентина Николаевнăпа Резида Ряшитовна асаннесем те пулнă ĕнтĕ. Хафизовсем тăватă ача çитĕнтерчĕç. Кĕçĕнни кăçал Хусана вĕренме кайрĕ. Аслисем те çавăнтах тĕпленнĕ вĕсен.
– 2009 çулхи пĕрремĕш çур çул валли хаçат-журнал çырăнтарас ĕçе тахçанах пуçăннă эпир. Районта тухса тăракан “Авангард” хаçата, акă, 62 экземпляр çырăнтарма та ĕлкĕртĕмĕр. Кăтарту кăçалхи иккĕмĕш çур çулхи шайĕнчен иртетех. Пирĕн тăрăхри чи килĕштернĕ хаçат вăл. Анат Туçари В.Немцев, Н.Беззубов, Тутар Тимешĕнчи С.Сафин тата ытти вуншар çемье кашни çур çултан çур çула кăмăлласа çырăнать ăна. Н.Немцева, акă, район хаçатне пĕринче те çырăнмасăр юлмастăпах, тет, – сăмах хушать подписка ыйтăвне хускатсан Валентина Николаевна.
Пĕчĕк хуранăн пăтти тутлă теççĕ. Çак йышпах килрен-киле хыпарсем çитерме, пенси-пособи валеçме ĕлкĕреççĕ почта ĕçченĕсем.
А.АСТРАХАНЦЕВА.