15 ноября 2008 г.
Сител хĕрĕ Эльвира Васильева Шупашкарта тухтăр пулса ĕçлет. Халĕ унăн хăйĕн çемйи, çавна май хушамачĕ те улшăннă – Портнова.
Çамрăк тухтăр шкулта вĕреннĕ чухнех тавракурăмĕпе, лайăх вĕреннипе палăрса тăратчĕ. Халĕ те тантăшĕсемшĕн ырă тĕслĕх пулса тăрать.
Мускавра “Тĕлĕнтермĕш уйĕ” программăн музейĕпе паллашнă вăхăтра анкета çырнă чухне Эльвира халăх кăмăллакан телепередачăна хутшăнасси пирки тĕлленмен те. Акă, виçĕ уйăх иртсен Леонид Якубовичран йыхрав килнĕ. Çемье канашĕнче тĕп хуламăра Эльвирăпа пĕрле ывăлĕ Сергей (сăн ÿкерчĕкре) тата Красномайск ялне качча кайнă йăмăкĕ Лариса ачипе хутшăнасси пирки пĕтĕмлетÿ тунă. Мускав çыннисене хăналама пĕрле шăрттан, ытти апат-çимĕç хатĕрленĕ. Вăйă вăхăтĕнче Сител хĕрĕ çавăрса янă кăлтăрмач “Приз” сектор тĕлĕнче чарăннă, парне вырăнне укçа илнĕ. Чăматан ăшĕнче вара çăмăл автомашина уççи кĕтнĕ.
Çак телепередачăна ноябрь уйăхĕн 28-мĕшĕнче 19.00 сехетре 1-мĕш каналпа курма пулĕ.
А.КОЗЛОВ.