19 ноября 2008 г.
Чăваш патшалăх университечĕн Патăрьелĕнчи филиалĕнче чăваш халăхĕн пĕрремĕш наци вĕренÿ заведенийĕн – Чĕмпĕрти чăваш шкулĕ 140 çул тултарнине халалласа наукăпа практика конференцийĕ иртрĕ. Унăн ĕçне район пуçлăхĕн пĕрремĕш çумĕ Р.Селиванов, университет ректорĕ Л.Кураков академик, И.Я.Яковлевăн мăнукĕн ачи, Мускаври М.Ермолова ячĕллĕ театрăн актерĕ В.Павлов кĕçĕн мăнукĕ, Мускав патшалăх университечĕн студентки Е.Павлова, филиал студенчĕсем, районти шкулсенчи чăваш чĕлхипе литература учителĕсем хутшăнчĕç. Конференцие филиал директорĕ Л.Лялина уçрĕ.
Университет ректорĕ Л.Кураков чăваш халăхĕн пĕрремĕш наци шкулĕн историйĕ çинче чарăнса тăчĕ. Ăна 1868 çулхи ноябрĕн 10-мĕшĕнче уçнă. Лев Пантелеймонович чăваш халăхĕн чĕлхи, йăли-йĕрки, культури шăпах И.Я.Яковлев просветителе пула сыхланса юлнине каласа пачĕ. Иван Яковлевич тăрăшнине пулах Чĕмпĕрти чăваш шкулĕ вăй илсех пынă. Вăл учительсене çеç мар, куçаруçăсене, литература ĕçченĕсене, музыкантсене хатĕрлеме пуçланă. Вĕрентÿ пособийĕсемпе кĕнекесем кăларма вăй-хал çитернĕ.
Район пуçлăхĕн пĕрремĕш çумĕ Р.Селиванов чăвашсене çутта кăларас ĕçре И.Яковлев педагогăн историллĕ пĕлтерĕшĕ çинче чарăнса тăчĕ. Район пурнăçĕпе паллаштарчĕ. Л.Кураков ертсе пынипе патриарх ĕçне-хĕлне тĕпчес енĕпе пысăк ĕç тунине палăртрĕ. Университет филиалĕ ял ĕçченĕсене ĕç вырăнĕнчен тăван килтен уйрăлмасăрах аслă пĕлÿ илме май панине каларĕ. Институтсене çул тытакан çамрăксене те экзаменсене хатĕрленме майсем пур унта. Л.Кураков çуралнă ялта – Чăваш Ишекĕнче – наукăпа творчество лабораторийĕ ĕçленине палăртрĕ.
А. ИВАНОВА.