19 ноября 2008 г.
Республикăра иртекен “Çамрăксем сывă пурнăç йĕркишĕн” акцие хутшăнса Патăрьелĕнчи культурăпа кану центрĕнче районти агитаци программисен конкурсĕ иртрĕ. Вăл сывă пурнăç йĕркине пропагандăлас, çамрăксене сăра-эрех ĕçес, пирус туртас, наркомани çулĕ çине тăрасран пăрас тĕллевпе иртрĕ.
Конкурса 16 шкулти 17 агитбригада хутшăнчĕ. 200 ача кăтартрĕ хăйсен пултарулăхне. Сывлăх кашни çыншăн çеç мар, пĕтĕм обществăшăн хаклă пулнине çирĕплетрĕç вĕсем сцена çинче. Уншăн кĕрешмеллине пĕлтерчĕç. Ачаран сывлăха çирĕплетме сĕнчĕç. Физкультурăпа, спортпа туслă пулмаллине ĕнентерÿллĕ кăтартрĕç.
“Агитпрограмма” номинаципе пĕрремĕш вырăна Хирти Пикшикри, иккĕмĕшне Ыхра Çырминчи, виççĕмĕшне Тутар Сăкăтĕнчи, Пăлапуç Пашьелĕнчи вăтам шкулсенче тата Первомайскинчи вĕрентÿ центрĕнче вĕренекенсем йышăнчĕç.
“Агитспектакль” номинаципе пĕрремĕш вырăна никама та паман. Иккĕмĕшне Аслă Чементи, виççĕмĕшне Турханти тата Патăрьелĕнчи пĕрремĕш вăтам шкулсенче вĕренекенсем тухрĕç.
Çĕнтерÿçĕ коллективсем район чысне зонăри конкурсра хÿтĕлеççĕ.
А.АСТРАХАНЦЕВА.