06 декабря 2008 г.
Чÿк уйăхĕн вĕçĕнче пирĕн районти чăваш чĕлхипе литература вĕрентекенĕсем Елчĕк районĕнчи Курнавăшри вăтам шкулти ĕçтешĕсен опычĕпе паллашма кайнă.
Вĕрентекенсем кăçал Раççей Президенчĕн грантне тивĕçнĕ Надежда Николаевна Круглова 5-мĕш класра Мария Ухсайăн “Ирхи сывлăм” хайлавĕпе йĕркеленĕ уçă урока итленĕ, аслă категориллĕ учителĕн ĕçне пысăка хурса хакланă.
Семинара хутшăннисем шкул музейĕнче пулнă, шкул, ял историйĕпе тĕплĕн паллашнă. Тĕллевлĕ, ĕçлĕ çул çÿрев пуриншĕн те усăллă иртнĕ.
Общество. Медицина.
Хальхинче Ыхра Çырмисем сывлăхне тĕрĕслеттернĕ
Нумай пулмасть хамăрăн ентеш, ЧПУн ректорĕ Л.П.Кураков академик тăрăшнипе тата пуçарнипе аслă шкулăн пысăк квалификациллĕ специалисчĕсем Лев Пантелеймоновичăн тăван ялĕнче – Чăваш Ишекре пулса чылайăшĕн сывлăхне тĕрĕсленĕ, вĕсене ырă сĕнÿ-канаш панă. Çак кунсенче пуян опытлă кардиолог, уролог, гинеколог, ача-пăча врачĕ тата ытти специалистсем те Ыхра Çырминче пурăнакансен ыйтăвне тивĕçтернĕ. Тĕрлĕ енĕпе ĕçлекен тухтăрсем ырă кăмăллăхпа кунĕпех шкул ачисене те, вăйпиттисене те, тивĕçлĕ канăва тухнисене те тĕрĕсленĕ, хăйсен сывлăхĕпе çыхăннă ыйтусене татса панă. Ял çыннисем пархатарлă ĕçшĕн пурте кăмăллă юлнă.