24 декабря 2008 г.
Патăрьел районĕн прокуратури çул çитмен çамрăксем хушшинче наркомание хирĕç кĕрешес, наркотиксен тата ăс-тăна сиен кÿрекен япаласен çаврăнăшне тĕрĕслесе тăрас енĕпе кăларнă саккунсене районта мĕнле пурнăçласа пынине тишкерсе тухрĕ.
Патăрьел районĕнче ку ыйтупа 2005-2009 çулсем валли çирĕплетнĕ программа пур. Ăна пурнăçлассине ертсе пыма ĕçлев ушкăнĕ йĕркеленĕ. Унăн ларăвĕсенче çамрăксене наркоманирен сыхлас ыйтусене тăтăшах сÿтсе яваççĕ.
Сывлăх учрежденийĕсене тĕрĕсленĕ хыççăн çакă палăрчĕ: 2007-2008 çулсенче районта çамрăксем хушшинче те, аслисем хушшинче те наркоманипе чирленине палăртман. Анчах çул çитмен пĕр çамрăка, наркăмăшлă япала сывлама хăнăхнăскере, сăнава илнĕ.
Сывлăх учрежденийĕсем хутшăннипе анонимлă консультаци пур. Унта 15 çын пынă. Вĕрентÿ пайĕ çумĕнчи психологи пулăшăвĕн центрĕнче наркологпа психолог йышăнассине йĕркеленĕ. Кăçал кăна 78 çул çитмен çамрăка консультаци панă. Районти тĕп библиотекăра “Тантăш” клуб ĕçлет. Кунта та 13 çынна канашпа пулăшнă. “Наркомания” тесе лартнă диагнозлисем, ку чирпе вилнисем пулман.
Наркомание хирĕç кĕрешес енĕпе районти çул çитмен çамрăксем тата вĕсен прависене хÿтĕлес енĕпе ĕçлекен комисси те асăрхаттаруллă мероприятисем ирттерсех тăрать. Ку тĕлĕшпе профилактика субъекчĕсен отчечĕсене итлессине йăлана кĕртнĕ. Комисси членĕсем “Çамрăксем сывă пурнăç йĕркишĕн” çулленхи акцие хастар хутшăнаççĕ. Комисси пĕр ача амăшне ывăлĕ ăсран кăларакан япалапа усă курнăшăн штрафланă. Унсăр пуçне комисси çул çитмен çамрăксем эрех-сăрапа ан туслашччăр тесе те тимлет. Ун пеккисене палăртса çул çитмен ачасемпе ĕçлекен уйрăмра çийĕнчех шута илеççĕ, обществăллă воспитательсем уйăраççĕ.
Райадминистрацин вĕрентÿ пайĕнче наркоманирен асăрхаттарас, çул çитмен çамрăксене усăллă ĕçе, канăва явăçтарас тĕллевпе чылай мерăсем пурнăçлаççĕ. Тĕслĕхрен, “Çамрăксем сывă пурнăç йĕркишĕн” акцие хутшăнса шкулсенче вун-вун тĕрлĕ мероприяти çĕршер ирттернĕ. Ку ĕçе профилактикăн пĕтĕм субъекчĕсем хутшăннă. Агитаци программисен конкурсĕнче 16 шкултан 17 команда тупăшнă.
Наркоманирен, алкоголизмран, пирус туртнинчен сыхланас ыйтусене шкул директорĕсен канашлăвĕсенче, директор çумĕсен семинарĕсенче час-часах пăхса тухаççĕ.
“Спорт наркотика хирĕç” Пĕтĕм Раççейри акцие хутшăнса шкулсенче кĕрхи кроссем, теннис, баскетбол, пукан йăтакансен, мини-футбол ăмăртăвĕсем пулнă.
Шалти ĕçсен пайĕн уйрăмĕнче шутра тăракансене тĕрлĕ кружока, 35-шне райспортшкул заняти-йĕсене явăçтарнă.
Наркотик, эрех-сăра сиенĕ пирки ыйтăмсем пулсах тăраççĕ. Ашшĕ-амăшĕпе педагогсен пĕрлехи патрулĕ те пысăк усă кÿрет.
Райадминистрацин опекăпа попечитель органĕ социаллăх тĕлĕшĕнчен начар çемьесене шута илнĕ. Вĕсенче асăрхаттаруллă ĕçсем хăй йĕркипе пулса пыраççĕ.
Патăрьел районĕнчи шалти ĕçсен пайĕ те наркомание хирĕç кĕрешессипе айккинче тăмасть. Кăçал кăна эрех-сăра ĕçме явăçтарнăшăн çулланă 9 çынна явап тыттарнă.
Çар ĕç комиссариатĕнче медкомиссисем наркотикпа çыхланнисене палăртман.
Наркотикпа иртĕнекенсем çукки лăпланса лармалли сăлтав ан пултăр. Ку ыйтăва кун йĕркинчен самантлăха та кăларма юрамасть.
Е.ИВАНОВА,
район прокурорĕн пулăшуçи.