27 декабря 2008 г.
Республика саккунĕпе килĕшÿллĕн сусăрсене ĕçе вырнаçтарассине те кун йĕркинче тытса тăма тăрăшатпăр. Ку ыйтупа районти ĕçпе тивĕçтерекен центрпа канашласа ĕçлетпĕр. Кăçал 4 çынна ĕçлĕ тунă.
Ял тăрăхĕсен, социаллă центр специалисчĕсемпе пĕрле инвалидсен, вĕсен çемйисен, сусăр ача çитĕнтерекенсен пурнăçпа йăла условийĕсене сăнасах тăратпăр. Ун тăрăх Раççей Пенси фончĕн районти уйрăмĕ урлă 27 инвалида 34840 тенкĕ пулăшу кÿнĕ.
Социаллă центр тĕрлĕ категорири граждансен социаллă йăла проблемисене татса парассипе тимлет. Вĕсен тĕп тĕллевĕ пĕччен пурăнакан ватăсемпе инвалидсене пулăшасси пулса тăрать. Центрăн виçĕ уйрăмĕ 180 ватă çынна килĕсенче кирлĕ пулăшу парать. Вăл шутран 49-шĕ – инвалид. Вăхăтлăх пурăнмалли уйрăмра аслă çулсенчи 39 гражданин социаллă йăла тивĕçтерĕвне илеççĕ.
Республика, район шайĕнчи конкурссене инвалидсене явăçтарассине мала хуратпăр. Çемье çулталăкĕн планĕпе килĕшÿллĕн, акă, Патăрьелĕнчи культурăпа кану центрĕнче зонăри “Инвалид çемйи” конкурс иртрĕ. Унта Шăмăршă, Елчĕк, Комсомольски, Патăрьел районĕсенчен хутшăнчĕç. Çĕнтерÿçисем пирĕн районтан пулчĕç. Вĕсем республикăри конкурса та хутшăнчĕç.
Районти социаллă центрта инвалид ачасен шашка тата дартс фестивалĕ иртнине те асăнса хăвармалла. Аслисем хушшинче шашкăлла, шахматла выляса тупăшрĕç. Çĕнтерÿçĕсем республикăри фестивале хутшăнчĕç.
Ф.МАЙОРОВА,
социаллă хÿтлĕх пайĕн заведующийĕ.