31 декабря 2008 г.
Шупашкарта Раççей Геройĕ Н.Гаврилов генерал-лейтенант парнисене çĕнсе илессишĕн ирĕклĕ майпа кĕрешессипе Пĕтĕм Раççейри уçă турнир иртнĕ. Унта пирĕн район спортсменĕсем начар мар çитĕнÿ тунă. Хăйсен виçисенче Шăнкăртамри Ильназ Чабатовпа Ильнар Тараков (тренерĕ Ф.Чабатов), Нăрваш Шăхалĕнчи Алексей Адикин (тренерĕ Н.Трифонов) çĕнтерÿçĕ ятне тивĕçнĕ.
Хĕрсенчен Анат Чакăри Аня Сидорова (тренерĕ М.Зейнетдинов) Эльза Тазетдиновăна выляса ярса иккĕмĕш вырăна тухнă. Сăмах май каласан Эльза пирĕн ентеш, Ыхра Çырминче çуралса ÿснĕ.
Аслă Чемен хĕрĕ, халĕ Шупашкарта пурăнакан Светлана Миронская (тренерĕ И.Исаев) та ăнăçлă кĕрешнĕ, пъедасталăн 1-мĕш картлашки çине хăпарма тивĕçнĕ.
Юлашкинчен тренерсен канашлăвĕ иртнĕ. Чăваш Республикин ирĕклĕ майпа кĕрешекенсен федерацийĕн йышăнăвĕпе 2008 çулта ăста кĕрешÿçĕсем хатĕрленĕ тренерсене чысланă. Çак чыса Юхмапа Пăла тăрăхĕнчен Чăваш Республикин тава тивĕçлĕ тренерĕ, халăха вĕрентес ĕç отличникĕ Мавлет Хабибуллович Зейнетдинов тивĕçнĕ.
А.ИВАНОВ.