13 января 2009 г.
Çĕнĕ Ахпÿртсем пахча çимĕç çитĕнтерессипе, хĕлле вара хоккейла выляссипе республикăра та ырă ят-сум çĕнсе илчĕç.
Раштав уявĕнче кунта район пуçлăхĕн парнисене çĕнсе илессишĕн хоккейла выляссипе турнир иртнĕ. Хоккеистсемпе куракансене уяв ячĕпе саламласа район пуçлăхĕ Н.Глухов, Елчĕк район пуçлăхĕ Н.Миллин, Чăваш Республикин Патшалăх Канашĕн депутачĕ В.Синеев, Çĕнĕ Ахпÿрт ял тăрăхĕн пуçлăхĕ В.Краснов çитĕнÿсем суннă.
Хоккей курупкине йĕркелекенĕ, “Олимп” команда тренерĕ Н.Михайлов юсав ĕçĕсем ирттерме, пăра хатĕрлеме пулăшнăшăн район пуçлăхне Н.Глухова тав туса (ÿкерчĕкре) хоккей патакки парнеленĕ.
Финалта кубокшăн патăрьелсемпе канашсем вылянă. Хĕрÿ вăйăра хуçасем вăйлăрах пулнă, кубока çĕнсе илнĕ.
Çутăпа тивĕçтернĕрен халĕ çĕнĕ ахпÿртсене каç сĕмĕ çапни те хăратмасть: пăр çинче чылайччен хаваслă шăв-шав лăпланмасть.
А.ИВАНОВ.