17 января 2009 г.
Чăваш Ен Президенчĕн Николай Федоровăн хушăвĕпе студентсен тата республикăри çамрăксен представителĕсене пултарулăхри пысăк ăнтăлушăн стипендисем пама йышăннă.
2009 çулта 1 пин каччăпа хĕр уйăхсерен 1830-шар тенкĕ илсе тăрĕ. Вĕсем çак чыса вĕренÿре, бизнес-проект тăвас енĕпе, наука, пултарулăх, производство, управлени ĕç-хĕлĕнче курăмлă çитĕнÿсем тунăшăн тивĕçнĕ.
Сумлă пулăшăва илекенсем хушшинче пирĕн район çамрăкĕсем те пур. Вероника Барышникова Патăрьелĕнчи 1-мĕш вăтам шкулта, Раиса Григорьева Нăрваш Шăхалĕнчи вăтам шкулта, Дмитрий Ивановпа Анастасия Медведева Аслă Чементи вăтам шкулта, Андрей Мешков Пăлапуç Пашьелĕнчи вăтам шкулта, Ираида Портновăпа Майя Филиппова Патăрьелĕнчи 2-мĕш вăтам шкулта, Ильнар Шамсутдинов Шăнкăртамри вăтам шкулта вĕренеççĕ. Алексей Ершовпа Ираида Никитина Ленин ячĕллĕ çĕр ĕç фирминче вăй хураççĕ. Юрий Лаврентьев – “Красное знамя” хуçалăхăн ĕне фермин заведующийĕ, Андрей Соловьев – “Исток” çĕр ĕç фирмин тракторисчĕ, Юрий Чанга – “Труд” хуçалăхăн механизаторĕ, Алина Ильина – Патăрьел ял тăрăхĕнчи çамрăксен координаци совечĕн ертÿçи, Асия Козлова – Тутар Сăкăтĕнчи вăтам шкул учительници.
Президент стипендине тивĕçнисем хушшинче Юхмапа Пăла тăрăхĕнче çуралса ÿснĕ, халĕ республикăн ытти кĕтесĕнче вĕренекенсем, ĕçлекенсем чылаййи те савăнтарать. Çапах та спортра пысăк çитĕнÿсемпе тĕлĕнтернĕ Ирина Юманова (Треньел), Эльза Тазетдинова (Ыхра Çырми), Алевтина Лисицынăпа Мария Соколова (Сител) ячĕсене асăнса хăварас килет. Вĕсем хальхи вăхăтра Шупашкарти Олимп резервĕсем хатĕрлекен училищĕре вĕренеççĕ.
Чăваш Енри пултаруллă тата талантлă çамрăксене патшалăх енчен пулăшасси, вĕсене аталанса пыма майсем туса парасси республика тытса пыракан политикăн тĕп çул-йĕрĕнчен пĕри пулса тăрать.
А.КОЗЛОВ.