17 января 2009 г.
“Самый классный, классный” конкурса хутшăнса Тутар Сăкăтĕнчи вăтам шкулта ятарлă мероприятисем иртрĕç. Тăваттăмĕшсем “А.Алиш тата вăл творчествăна таврăнни” ятпа йĕркеленĕ уçă класс сехетне ашшĕ-амăшне, библиотекаре, виççĕмĕшсене чĕнчĕç. Мероприятие пуçланă май С.Хакимова класс ертÿçи юратнă писатель пурнăçĕпе иртнĕ вĕренÿ çулĕнчех паллашнине, кăçал унăн ĕçĕ-хĕлне тишкернине каларĕ.
Б.Айзатуллов вĕренекен “Алиша – 100 çул” тĕпчев ĕçĕпе паллаштарчĕ. Вăл унпа Первомайскинче ирттернĕ наукăпа практика конференцийĕнче пĕрремĕш вырăн çĕнсе илнĕ. Пĕрлех писатель сăввисене, çырăвĕсене вуларĕ.
Мероприяти вăхăтĕнче вĕренекенсем автор сăввисемпе çырнă патриотла юрăсене юрларĕç, сăввисене аса илчĕç, сценка лартрĕç. Класс ертÿçи викторина ирттерчĕ. Вăлах шкулти класс ертÿçисен хушшинче çĕнтерÿçĕ пулнă, районти конкурса хутшăнма хатĕрленет.
А.АБЯНОВА.