31 января 2009 г.
Чăваш Ен Президенчĕ Н.Федоров 2009 çула Çĕр ĕçченĕн çулталăкĕ тесе палăртрĕ. Ял çыннин пурнăçне çак Указ чылай ырă енпе çĕнĕлĕх кĕртĕ. Çав вăхăтрах унта халăх йăлисене, фольклорне, пултарулăхне сыхласа хăварасси тата аталантарасси çинчен каланă йĕркесем те пур. Аваллăхсăр малашлăх çук тетпĕр. Хаклă район çыннисем, сирĕн çемье архивĕнче районăн, ялсен, çĕр çыннисен ĕлĕкхи пурнăçне, ĕçĕ-хĕлне, йăли-йĕркине сăнлакан сăн ÿкерчĕксем пурах ĕнтĕ (1990 çулччен ÿкернисем). Мĕншĕн вĕсене халăха кăтартас мар; Шăпах çакна “Авангард” хаçат хăй çине илес терĕ, февраль-ноябрь уйăхĕсенче “Кивĕ сăн ÿкерчĕк” фотоконкурс йĕркелеме йышăнчĕ.
Конкурса лайăх пахалăхлă сăн ÿкерчĕксене çеç илетпĕр: сăнсене уйăрма çук, сарăхнă ÿкерчĕксемпе хаçатра усă кураймастпăр. Çавăн пекех сăн ÿкерчĕке миçемĕш çулта ÿкернине, унта камсене е мĕн сăнланине, вăл камăн çемье архивĕнче упраннине те палăртма ан манăр. Çĕнтерÿçĕсене çулталăк вĕçĕнче чыслăпăр.