31 января 2009 г.
Чăваш Республикин Президенчĕ сывă пурнăç йĕркине тытса пымаллине, халăха массăллă спорта явăçтарас тĕлĕшпе пĕтĕм вăя парса ĕçлемеллине пĕрре мар каланă ĕнтĕ. Аслă Чемен ял тăрăхĕнче те çакна тĕпе хураççĕ. Акă, кунта депутатсен округĕсем хушшинче спартакиада иртрĕ. Чи малтанах спортсменсем шкул спорт залне пуçтарăнчĕç. Ăмăртăвăн тĕп судйи П.Макаров ял тăрăхĕн пуçлăхне Г.Медведева командăсем ăмăртăва хутшăнма хатĕррине пĕлтерсе рапорт пачĕ. Ун хыççăн спартакиадăна хутшăнакансем тĕрлĕ ăмăртура тупăшма пуçларĕç. Кире пуканĕ йăтса хĕрарăмсем хушшинче шкул директорне М.Медведевăна çитекенни пулмарĕ. Арçынсем хушшинче вара Президент кубокĕшĕн зонăри ăмăртусен çĕнтерÿçи, 10-мĕш класра вĕренекен Я.Фролов мала тухрĕ. А.Фроловпа Л.Чегаева шашкăлла никама та выляса ямарĕç.
Алă вăйĕ виçсе ял тăрăхĕн пуçлăхĕ Г.Медведев çĕнтерÿçĕ пулса тăчĕ. 8-мĕш класра вĕренекен, республикăри призер М.Егорова вара пурне те тĕлĕнтерчĕ.
Канат туртса питĕ çивĕч кĕрешÿ пулчĕ. Садовăй урамри арçынсем те, хĕрарăмсем те чи вăйлă пулнине çирĕплетсе пачĕç. Спорт çемйисен ăмăртăвĕнче Матроссовсем тата Капитоновсем чи пултаруллисем пулчĕç.
Юлашкинчен командăсем волейболла вылярĕç. Кунта пĕр вăйă та выляса ямасăр Туптов урамĕнче пурăнакансем çĕнтерчĕç. Аслă Чементи Садовăй тата Тури Чакăри Центральнăй урамсенчи спортсменсем 2-мĕш вырăна пайларĕç.
Очкосене хушнă хыççăн Туптов (депутачĕ П.Антонов) “Садовăй” (депутачĕ Н.Кошелева) урамсенчи командăсем мала тухрĕç. “Подлесная” (депутачĕ А.Фролов) урам команди вара 2-мĕш вырăна йышăнчĕ.
Спартакиадăна хутшăнса çĕнтернисене ял тăрăхĕн пуçлăхĕ парнесемпе хавхалантарчĕ.
Н.КОШЕЛЕВА.