04 февраля 2009 г.
Пысăках çав пирĕн район. Патăрьелпе çеç пĕр вĕçĕнчен тепĕр вĕçне утса тухас пулсан та сахал мар вăхăт кирлĕ. Куллен утăмлакансем пур çакна. Паллах, тÿрĕ урамĕпе мар. Пиллĕкĕн пилĕк еннелле çÿреççĕ. Почтальонкăсем вĕсем.
– Хăрах алăри пÿрне те çитмест хуçлатса пырса шутлама. Эпĕ Совет урамĕн хĕвел тухăç енче, Талвир, Çĕнтерĕве 50 çул ячĕллĕ, Çамрăксен, Крепков, Калинин ячĕпе хисепленсе тăракан урамсенче пурăнакансене хаçат-журнал, пенси-пособи валеçетĕп, – тет Н.Ракова почтальонка. – Ĕç сумкине хулпуççи урлă çакни 20 çул çитет.
Хăйĕн ĕçне тивĕçлипе пурнăçлама тăрăшать Надежда Николаевна. Пĕр тĕслĕхпе çеç çирĕплетер. Акă, 2008 çулхи иккĕмĕш çур çулта вăл район хаçатне 83 экземпляр валеçнĕ. Кăçалхи пĕрремĕш çур çул валли илсе тăма 110 экземпляр çырăнтарнă. Февраль уйăхĕнчен çак кăтарту тата та ÿсрĕ.
Почтальонка сумкине пушă çÿретмест вăл. Çырăнтару ĕçне малтанах тăрăшса пуçăнать. Хăй çÿрекен урамсенче кам мĕнле хаçат-журнал кăмăлланине пĕлет. Аверкийпа Петр Николаевсем, Д.Енилин, И.Махмутов тата ыттисем те район хаçачĕсĕр пĕрре те юлмаççĕ.
– “Батыревский” пĕрлешÿре ĕçлекенсем ытларах пурăнаççĕ çÿлерех асăннă урамсенче. Ĕç укçине вĕсем вăхăтра илеççĕ. Тÿлевĕ тивĕçтерет. Çавăнпа район хаçатне пĕр сиктермесĕр кăмăлласах çырăнаççĕ, – хавхаланса каласа парать Надежда Николаевна.
Чăннипех те маттур вăл хăйĕн ĕçĕнче. Кашни çын уйрăм çуртпа пурăнать ку енче. Пурин патне те вăхăтра çитерет хаçата. Л.Яковлева, Е.Бородова почтальонкăсемпе ăмăртса ĕçлет тесен те йăнăш пулмĕ.
Çемьен юратнă хаçачĕ те “Авангард”. Çĕнĕ хыпарсемпе паллашассине çакăнтан пуçлать мăшăрĕ Валерий Федорович.
Хăйĕн ĕçĕнчи тепĕр вăрттăнлăхне те уçрĕ Н.Ракова. Хаçат-журнал çырăнтармалли ĕç планне “Авангардпа” тултарма тăрăшать вăл. Хакĕ тивĕçтерет. Эрнере икĕ хутчен тухать. Номерсем сикмеççĕ. Вăхăтра вулакан патне çитет. Çырăнакансен умĕнче нимĕнле яваплăх та тытмалли çук. Ытти почтальонкăсем те ку енĕпе хăйĕнчен тĕслĕх илессе шанать Н.Ракова.
А.ИВАНОВА.