04 февраля 2009 г.
Нăрваш Шăхалĕнчи тыл ветеранĕ, “Труд” колхозăн тава тивĕçлĕ колхозници Антонина Ивановна Афанасьева пилĕк ывăлпа пĕр хĕр çуратса ÿстерсе пурнăç çулĕ çине кăларчĕ. Мăшăрĕ, Семен Сергеевич, чĕре чирĕпе аптăраса çамрăкла çĕре кĕчĕ.
Çавăнпа та ачисем çамрăклах ĕçе кÿлĕнчĕç, шкулта лайăх вĕренсе, спортра çитĕнÿ туса савăнтарчĕç.
Хаçат вулакансене ывăлĕсенчен пĕринпе – Николай Семеновичпа тĕплĕнрех паллаштарасшăн. Çак кунсенче çур ĕмĕр тултарнă çемье пуçлăхĕ пурнăç çулĕ çинче çирĕп тăрать. Алла аттестат илнĕ каччă шкултан вĕренсе тухсанах Шупашкарти энерготехникумра пĕлĕвне малалла тăсать. Тăватă çул хастар та пултаруллă студент пулса тăрăшать вăл кунта. Алла диплом илнĕ хыççăн çар хĕсметне каять.
Салтак служби мотострелоксен чаçĕнче иртет. Николай кунта та кăтартуллисен йышĕнче пулнă. Ахаль салтакран взвод командирĕн çумĕ таран ÿсет вăл, сержант ята илет.
1982 çулта çар хĕсметĕнчен таврăннă хыççăн хăйĕн малашнехи пурнăçне йăлтах спортпа çыхăнтарать, малалла вĕренсе аслă пĕлÿ илет, велосипедпа район, республика чысĕшĕн чупса малти вырăнсене йышăнать, спорт мастерăн кандидачĕн ятне çĕнсе илет. Каярахпа вара вăл спортăн асамлă тĕнчине шăллĕсене те, мăшăрланнă хыççăн хăйĕн çемйине те явăç-тарать.
Ырă та кăтартуллă, ĕçчен, спортпа туслă çемье Афанасьевсем. Дима ывăлĕпе Оля хĕрĕ иккĕшĕ те вăтам шкултан ылтăн медальпе вĕренсе тухнă. Дима ашшĕ пекех спорт мастерăн кандидачĕ. Вăл çуран чупассипе, йĕлтĕрпе, велосипедпа иртекен ăмăртусенче яланах малтисен йы-шĕнче пулнă. Халĕ Дима Чăваш патшалăх университетĕнче аслă пĕлÿ илнĕ хыççăн Мускавра программистра ĕçлет. Хĕрĕ вара ЧПУра студентсене ют чĕлхене вĕрентет. Мăшăрĕ, Виталина Николаевна, Патăрьелĕнчи пĕрремĕш вăтам шкулти вырăс чĕлхи учительници. Николай Семенович «Халăха вĕрентес ĕç отличникĕ» паллă илме тивĕçнĕ. Вăл тăрăшнипе тата пулăшнипе вунă çамрăк спорт мастерăн кандидачĕн ятне илнĕ. Паллах, çак çитĕнĕве тума, вĕсене хатĕрлеме чылай вăй хума, тăрăшма тивнĕ. Халĕ вĕсем çĕр-шывăн тĕрлĕ кĕтесĕнче пурăнаççĕ, хăйсен тренерĕпе çирĕп çыхăну тытаççĕ.
1997 çултанпа Николай Афанасьев район администрацийĕн физкультурăпа спорт пайĕн ертÿçинче вăй хучĕ. Хальхи вăхăтра районти вĕрентÿ пайĕн пуçлăхĕн çумĕнче тăрăшать.
Б.КОШКИН.
Нăрваш Шăхаль.