04 февраля 2009 г.
Нарăс уйăхĕн 15-мĕшĕнче Пĕтĕм Раççей йĕлтĕр çине тăрĕ. Вăл шутра – пирĕн районта та. Çак кун Юхмапа Пăла тăрăхĕнчи сывă пурнăç йĕркине хисеплекен, йĕлтĕр спортне кăмăллакансем Первомайскине пуçтарăнĕç.
Ăмăртăва пысăк шайра ирттерес тĕллевпе йĕркелÿ комитечĕ туса хунă. Унăн ĕçне район пуçлăхĕн пĕрремĕш çумĕ Р.Селиванов ертсе пырать. Пĕтĕмĕшле вара ăмăртушăн районти вĕрентÿ пайĕ яваплă.
Тĕрлĕ çулсенчи йĕлтĕрçĕсем валли, тĕпрен илсен, 3 километр дистанци хатĕрленĕ,VIP-чупура вара 2014 метр хыçа хăвармалла. Çĕнтерÿçĕсене тĕрлĕ номинацире палăртĕç. Массăллă чупăвăн мандат комиссийĕ нарăс уйăхĕн 10-мĕшĕнче ĕçлеме пикенет.
Ăмăрту пирки тĕплĕнрех физкультурăпа спорт, туризм тата çамрăксен политикин центрне 6-24-20 телефонпа шăнкăравласа пĕлме пулать.
Хаклă район çыннисем, йĕлтĕр сырса уява хутшăнма тăрăшар!
(Хамăр корр.).