11 февраля 2009 г.
Хĕлле урапа хатĕрлеме хушнă ĕлĕкхи ватăсем. Апла пулсан акана тухиччен мĕн кирлине янтăлама халех пуçăнмалла. “Батыревский” хупă акционерла обществăра яваплă тапхăра паян тесен паян тухма хатĕр. Кунта çунтармалли-сĕрмелли материалсене 100 тонна яхăн хатĕрленĕ, вăл шутран бензин – 20 тонна, çу – 5, топливо – 70. ГСМ хакĕ халь йÿнĕ, ака, вырма вăхăтĕнче ÿсет. Çак шухăша тĕпе хурса Патăрьелсем ăна çителĕклĕ турттарнă.
Техникăн 90 проценчĕ çĕнĕ, юсав пайĕсем те пур. Мастерскойĕнче ĕç шавĕ тăрать, шанчăксăртарах тракторсене пикенсех юсаççĕ.
Тĕш-тырра раштав уйăхĕнчех сортласа, тасатса акма юрăхлă тунă. Ют хуçалăхсене, уйрăм çынсене сутмалăх тулă – 370, урпа 192 тонна пур. Вĕсене те кондицие лартнă.
(Хамăр корр.).