11 февраля 2009 г.
Юхмапа Пăла тăрăхне ахальтен мар ĕнтĕ “Паттăр ен” тесе хаклаççĕ. Чăннипех те ентешсем маттурришĕн чун савăнать. Спортра вара уйрăмах кĕрешесси вăйлă аталаннă. Ĕлĕкренпех акатуй-сабантуйри кĕрешÿçĕ-паттăра халăх çав тери хисепленĕ, çĕлĕк хывса саламланă. Акă, пĕлтĕр Мускавра чăвашсен акатуйĕнче Тутар Сăкăтĕнчи тĕреклĕ те патвар Р.Козлов така çĕнсе илме пултарчĕ. Чечен, Дагестан кĕрешÿçисене, финалта Грузи çĕр-шывĕн паллă спортсменне çурăм çине вырттарчĕ пирĕн ентешĕмĕр. Çакă мар-и чăн-чăн паттăрлăх, мăнаçлăх;!
Кашни ял тăрăхĕнче тенĕ пекех ирĕклĕ майпа кĕрешекенсен секцийĕсем ĕçлеççĕ. Шкулта вĕреннĕ вăхăтрах Раççей чемпионĕн ятне тивĕçнисем те чылай, тĕнче шайĕнчи ăмăртусене хутшăнакансем те пур. Çамрăксене сывă пурнăç йĕркине явăçтарнине ырламалла çеç. Шăпах çакăн пек çынсенчен пĕрин – Чăваш Республикин физкультурăпа спортăн тава тивĕçлĕ ĕçченĕ, Чăваш Республикин тава тивĕçлĕ тренерĕ, Раççей спорт мастерĕ Владимир Михайлович Семенов парнисене çĕнсе илессишĕн Патăрьелĕнчи “Паттăр” физкультурăпа спорт комплексĕнче кĕрешекенсен республикăри уçă турнирĕ иртрĕ.
В.Семеновăн ачалăхĕ Каншел, Анат Чакă ялĕсенче иртнĕ. Первомайскинчи вăтам шкулта вĕреннĕ чухне М.Зейнетдинов физкультура учителĕ пулăшнипе ирĕклĕ майпа кĕрешес тĕлĕшпе пĕрремĕш утăмсем тунă.
Чăваш ял хуçалăх институтĕнче пĕлĕвне малалла тăснă май секцине пĕр сиктерми çÿренĕ. Кавир çинче тар кăларни сая кайман. Владимир тутарла-пушкăртла, классика, ирĕклĕ майпа кĕрешессипе те Пĕтĕм Раççейри турнирсенче пĕрре мар çĕнтернĕ. Алла диплом илсен вара тренер про- фессине суйласа илнĕ. Çирĕм пилĕк çул ытла ĕнтĕ вăл республикăри ирĕклĕ майпа кĕрешекенсен аслă тренерĕ. Унăн вĕренекенĕсем, аллă ытла каччăпа хĕр, спорт мастерĕн нормативне тултарнă. Вĕсенчен чылайăшĕ Раççей чысне Европа, тĕнче турнирĕсенче ăнăçлă хÿтĕленĕ. Çавăн пекех Владимир Михайлович обществăлла ĕçре те харсăр: ирĕклĕ майпа кĕрешекенсен республикăри федерацийĕн вице-президенчĕ, Шупашкарти Патăрьел районĕн ентешлĕхĕн ертÿçи.
Сумлă лару-тăрура ăмăртăва уçнă май Владимир Михайловича, кĕрешекенсене саламласа, çитĕнÿсем сунса район пуçлăхĕ Н.Глухов, ЧР Патшалăх Канашĕн депутачĕ О.Викторов, Шупашкарти Ленин район пуçлăхĕ А.Зайцев, Европа чемпионĕ пулнă М.Тазетдинов, О.Маркиянов профессор тата ытти хаклă хăнасем тухса калаçрĕç. Чăваш юрăçисем И.Христофоров, Н.Заводскова, ЧП Патшалăх Канашĕн депутачĕ О.Викторов Непал студенчĕпе, “Паттăр” физкультурăпа спорт комплексĕ çумĕнчи ташă ушкăнĕ хăйсен пултарулăхĕпе савăнтарчĕç. Икĕ кавир çинче 200-е яхăн каччăпа хĕр тупăшрĕç. Çивĕч кĕрешÿсенче пирĕн районтан хăйсен виçисенче А.Адикин пĕрремĕш, В.Нянин иккĕмĕш, А.Филиппов виççĕмĕш вырăн йышăнчĕç. Вĕсене Н.Трифонов, И.Алеев, А.Камалетдинов тренерсем хатĕрленĕ. 84 килограмлисем хушшинче Шупашкарти С.Ягудин çĕнтерчĕ. Сăмах май, Сергейăн ашшĕ Каншелĕнче çуралса ÿснĕ.
Яланхи пекех хĕрсем хушшинче М.Зейнетдинов тренерăн вĕренекенĕсем ăнăçлă кĕрешрĕç. Хăйсен виçинче К.Смирнова (Ишлĕ) пĕрремĕш, А.Михайлова (Ишлĕ), И.Клементьева (Первомайски) иккĕмĕш, А.Сидорова (Первомайски), Д.Чинкина (Хирти Пикшик, тренерĕ И.Алеев) виççĕмĕш вырăн йышăнчĕç.
Шупашкарти олимп резервĕсем хатĕрлекен училищĕре вĕренекен Сител хĕрĕсем – А.Лисицынăпа М.Соколова пъедесталăн 1-мĕшпе 2-мĕш картлашки çине хăпарчĕç. Вĕсен пĕрремĕш тренерĕ каллех Мевлет Хабибуллович. Чăваш Республикинчи ирĕклĕ майпа кĕрешекенсен федерацийĕн йышăнăвĕпе А.Лисицынăна “Чи лайăх спортсмен-2008”, унăн пĕрремĕш тренерне М.Зейнетдинова “Чи лайăх тренер-2008” ятпа чысларĕç.
Çĕнтерÿçĕсемпе призерсене кубоксем, дипломсем, хаклă парнесем парса хавхалантарчĕç.
А.КОЗЛОВ.