14 февраля 2009 г.
Паян ял хуçалăхĕ пĕр вырăнта тăмасть, çĕ-нĕлĕхсем кĕрсех тăраççĕ. Вĕсем вăй хураканăн ĕçне çăмăллатассипе, укçа-тенке перекетлессипе, пахалăхлă, тăкаксăр продукци туса илессипе çыхăннă. Çĕнĕлĕхсемпе хуçалăхри тĕп специалистсене, фермер хуçалăх ертÿçисене паллаштарма районта февралĕн 11-мĕшĕнче “Агро-Инноваци” кунĕ иртрĕ. Çак куна республикăри “Агро-Инноваци” хысна унитари предприятийĕ йĕркелесе ирттерчĕ, унта çĕнĕ технологисене пурнăçа кĕртессипе ĕçлекен пай начальникĕ Ю.Егоров, Г.Комаров консультант-экономист, И.Капитонова консультант-зоотехник, А.Беляков консультант-агроном, В.Мутиков профессор хутшăнчĕç.
Канашлу-вĕрентĕве килнисем икĕ ушкăна пайланчĕç. Пĕрремĕшĕнче фермер хуçалăх ертÿçисем, агрономсем, экономистсемпе инженерсем пулчĕç. Вĕсем ÿсен-тăран отраслĕнче ресурса перекетлекен технологисене пурнăçа кĕртесси, ĕç укçи тÿлесси тата ÿсен-тăранпа выльăх-чĕрлĕх отраслĕсенче тăкаксене планласси пирки докладсем итлерĕç.
Иккĕмĕш ушкăна зоотехниксем, ферма заведующийĕсем, ветеринарсем кĕчĕç. Кунта выльăх-чĕрлĕх отраслĕнче мĕнле пахалăхлă апат хатĕрлени пысăк вырăн йышăнни тата çамрăк выльăхсене интенсивлă технологипе ÿстересси пирки сăмах пычĕ.
О.ПАВЛОВА.