14 февраля 2009 г.
Афганистанран Совет çарĕсене илсе тухнăранпа ыран 20 çул çитет. Февралĕн 15-не çывăхри тата инçетри ют çĕр-шывсенчи çар хирĕçĕвĕсене лăплантарма хутшăннă Воин-интернационалистсен кунĕ тесе палăртатпăр.
Çак куна асăнса Патăрьел тата Шăмăршă районĕсен çар комиссариатĕнче Афган тата Чечен çĕр-шывĕнчи вăрçăсене Юхмапа Пăла тăрăхĕнчен хутшăннисен тĕл пулăвĕ иртнĕ. Çавăн пекех тĕл пулăва район пуçлăхĕн пĕрремĕш çумĕ Р.Селиванов, Патăрьел тата Шăмăршă районĕсен çар комиссарĕ В.Яковлев хутшăннă, ертсе пынă.
Пуçтарăннисем салтакра пулнă вăхăтсене аса илнĕ, вăрçăра пуç хунисене асăнса пĕр самант шăп тăнă.
Афган вăрçинче пирĕн районтан 7 çамрăк ĕмĕрлĕхех куçĕсене хупнă. Шăнкăртамри М.Валитов, Сителти А.Журавлев, Кĕçĕн Арапуçĕнчи Г.Козлов, Тутар Сăкă-тĕнчи Р.Куликов, Сăкăтри М.Митинпа Н.Родионов, Турханти В.Перлов çемье çавăрса ачисене утьăкка сиктереймерĕç. Вĕсене асăнса лартнă палăк-танк патне гирлянда хунă (ÿкерчĕкре, 1 стр.).
Районта халĕ 104 афганец пурăнать. Интернационалист-салтаксен кунне уявланă май паян Çĕнĕ Ахпÿртре В.Тукмаков афганеца асăнса хоккей турнирĕ иртет. Ыран Первомайскинче иртекен Пĕтĕм Раççейри “Раççей йĕлтĕр йĕрĕ-2009” чупăва та афганецсем хастар хутшăнасса шанатпăр. А.ИВАНОВ.