21 февраля 2009 г.
Нăрваш Шăхалĕнчи вăтам шкул спортзалĕнче ял тăрăхĕн пуçлăхĕн парнисене çĕнсе илессишĕн волейбол турнирĕ иртрĕ. Пурĕ пилĕк команда тупăшрĕ. Ăмăрту парачĕ хыççăн площадкăна студентсемпе шкул ачисен командисем тухрĕç. Студентсем шкул ачисенчен 2:0 шутпа выляса илчĕç. Сăмах май каласан, шкул ачисем тепĕр вăйăра та ветерансене 1:2 шутпа выляса ярса малаллахи ăмăртуран тухса ÿкрĕç. Тепĕр тĕл пулура ял çамрăкĕсемпе учительсен командисем тупăшрĕç. 25:18, 25:22 шутсемпе выляса илсе учительсен команди çĕнтерчĕ. Ку команда ветерансенчен те выляса илсе финалти ăмăртăва хутшăнчĕ. Тепĕр тĕл пулура ветерансем студентсемпе вăй виçрĕç. Вăйă питĕ интереслĕ те çивĕч иртрĕ. Пĕрремĕш тапхăрта ветерансем çÿлти шайра пулчĕç. Иккĕмĕш тапхăрта студентсем ветерансене парăнтарса виççĕмĕш тапхăрта вылярĕç. Ветерансем, студентсем хăвăрт та ăнлануллă вылянине хирĕç нимех те тăваймарĕç, выляса ячĕç. Виççĕмĕш тапхăрта çивĕч те интереслĕ тĕл пулура çамрăк студентсем тин кăна хăйсене вĕрентсе аслă çул çине кăларнă учительсен командинчен 2:0 шутпа выляса илсе çĕнтерÿçĕсем пулса тăчĕç. Çапла вара студентсем пĕрремĕш, учительсен команди иккĕмĕш, ветерансем виççĕмĕш вырăнсене йышăнчĕç. Юлашкинчен малти вырăнсене йышăннă командăсене Нăрваш Шăхаль ял тăрăхĕн пуçлăхĕ Н.Яковлев Хисеп грамотисем, парнесем парса чыс турĕ, çак ăмăртăва манăçа ямасăр кашни çулах ирттермеллине палăртрĕ.
В.БОРОДКИН,
волейбол спорчĕн ветеранĕ.