26 февраля 2009 г.
Район администраци çумĕнче наградăсем парас енĕпе ĕçлекен комиссин ларăвĕ пулса иртрĕ. Унта районти тĕрлĕ учрежденисем, предприятисемпе организацисем хăйсем патĕнче хастар ĕçленĕшĕн, тĕрлĕ шайри грамотăпа наградăлама ыйтса çырнисене пăхса тухрĕç, тивĕçлĕ пĕтĕмлетÿ турĕç.
Çав вăхăтрах комисси умне шухăшлаттаракан ыйтусем те тухса тăчĕç. Сăмахран, Раççей Федераци Президенчĕ çумĕнче патшалăх наградисем парас енĕпе ĕçлекен комиссин 2008 çулхи декабрĕн 25-мĕшĕнче çирĕплетнĕ йышăнăвĕпе килĕшÿллĕн Чăваш Республикин Сывлăха сыхлас тата социаллă аталану министерствин районти халăха социаллă хÿтлĕх парас енĕпе ĕçлекен уйрăмĕ Патăрьел районĕнчи пур ял тăрăхĕсене те ятарлă çырусемпе тухнă. Унта кашни ял тăрăхĕн “Родительская слава” орденпа наградăлама тивĕçлĕ пĕр çемье çинчен тĕплĕн характеристика çырса, 2009 çулхи январĕн 30-мĕшне района çитермеллине каланă. Ку çырăва 2009 çулхи январь уйăхĕн 27-мĕшĕнче, электронлă почтăпа ял тăрăхĕсене ярса панă.
2009 çулхи февралĕн 10-мĕшĕ тĕлне 19 ял тăрăхĕнчен 9-шĕ çеç тивĕçлĕ кандидатурăсем çинчен характеристика тăрăтнă. Вĕсем çаксем: Алманчă, Аслă Чемен, Патăрьел, Кзыл Чишма, Первомайск, Сăкăт, Турхан, Çĕньял, Шăхач, Тутар Сăкăт ял тăрăхĕсем. Çав вăхăтрах Ишлĕ, Пăлапуç Пашьел, Хирти Пикшик, Ыхра Çырми, Çĕнĕ Ахпÿрт, Нăрваш Шăхаль, Шăнкăртам, Туçа тата Тăрăн ял тăрăхĕнче ĕçлекенсем çак çырăва нимĕнле хурав та паман. Сăлтавĕ те паллă мар. Унта ĕçлекенсен талăкри ĕç вăхăчĕ кĕскерех-ши; Хăйсен ял тăрăхĕнче пурăнакан ырă çемьесем камсем иккенне пысăк вăрттăнлăхра тытас теççĕ-ши;
Асăннă ял тăрăх пуçлăхĕсем хăюлăх çитерсе çитес кунсенчех çав вăрттăнлăха района ертсе пыракансем умĕнче уçса парасса комисси шансах тăрать.
Н.Тельцов,
комисси членĕ, ĕç ветеранĕ.