26 февраля 2009 г.
Анат Тăрмăшĕнчи ял клубĕнче кашни уяврах лăк тулли халăх пуçтарăнать. Юлашки мероприятие вĕсем Тăван çĕр-шыв хÿтĕлевçисене халалланă. Çак сăлтавпа “Айтăр-ха, каччăсем” конкурс йĕркеленĕ. Сакăр каччă хутшăннă вăйăпа кулă тупăшăвне. Ю.Фомин ертсе пынипе конкурса хутшăнакансем пăшалтан ăста тĕл перессипе, салтакран чун варли патне ăшă çыру çырассипе, тĕрлĕрен ыйтăва тулли хурав парассипе, уяв тортне васкавлă та тирпейлĕ çиессипе тупăшнă.
Çивĕч вăйăсенче Юрийпе Валерий Карлиновсем (иккĕшĕ те çар хĕсметĕнче пулнă) пĕрремĕш-иккĕмĕш вырăнсене йышăннă, П.Антоновпа С.Остроумов – виççĕмĕшсем.
Тăван çĕр-шыв хÿтĕлевçисен кунĕ ячĕпе В.Путяков художество ертÿçи ертсе пынипе янăранă юрă саламĕсем пурне те савăнтарнă.