26 февраля 2009 г.
Нарăсăн 15-мĕшĕнче Çĕнĕ Шупашкарта “Сетокан” каратэ мелĕпе кĕрешсе Чăваш Республикин уçă чемпионачĕ пулса иртрĕ. Патăрьел район чысне хÿтĕлеме пĕрремĕш вăтам шкултан Д.Софронов, иккĕмĕш вăтам шкултан Э.Тихонов, С.Антонов хутшăнчĕç.
Ăмăртăва Чăваш Республикинчен çеç мар, ытти кÿршĕ регионсенчен те чылай спортсмен пуçтарăннă. Хăйсен кĕрешÿçисене Самара, Тольятти хулисенчен, Мари Ел, Удмурти республикисенчен илсе килнĕ.
Çивĕч кĕрешÿре Патăрьелĕнчи пĕрремĕш вăтам шкулта вĕренекен Д.Софронов 12-13 çулхисем хушшинче пĕрремĕш вырăн çĕнсе илсе Чăваш Республикин чемпионĕ пулса тăчĕ. Вăл ытти çулсенче те чемпион ятне илме тивĕçлĕ пулнă.
Патăрьелĕнчи 2-мĕш вăтам шкулта вĕренекен Э.Тихонов 14-15 çулхисем хушшинче виççĕмĕш вырăн çĕнсе илчĕ. Пултаруллă ачасем шкулта та лайăх вĕренеççĕ, спортпа та туслă.
П.Никифоров.